無綫昨午在電視城舉行《TVB傳情馬來西亞》綜藝節目，並安排於娛樂新聞台直播，但由於電視城發出「封城」通告，故不接待傳媒入內採訪。一眾藝人及歌手都戴口罩演出，菊梓喬（Hana）更疑似咪嘴獻唱。
曹永廉、蕭正楠、蔡思貝、陳敏之、林淑敏、姚子羚及周柏豪等，昨午直播時都戴上口罩出鏡；節目於馬來西亞同時直播。他們都表示因疫情關係，暫時未能到大馬與粉絲見面，希望疫情盡快過去。
節目跟以往的綜藝節目沒分別，離不開《歡樂今宵》形式的唱歌及玩遊戲環節，並宣傳即將在大馬播放的劇集及節目。所有歌手均戴住口罩唱歌，做足安全措施，不敢掉以輕心，不過Hana唱《我輸不起》時，卻疑似咪嘴獻唱。
當一眾藝員玩遊戲時，均提醒觀眾注意防疫，曹永廉取笑蕭正楠說︰「啱啱新婚嗰啲就盡量唔好接吻啦！」姚子羚則表示︰「呢排盡可能都留喺屋企，我外出都會自備餐具，就算屋企嘅狗仔都會幫佢戴口罩。」陳敏之亦呼籲大家勤洗手：「呢段時間我盡量唔畀小朋友出街，減輕醫護人員負擔，囝囝都好聽話，我每次外出前，佢都會提醒我記得戴口罩。」
大小姐唔想嫁
至於「大小姐」林淑敏提到許家傑以《機場特警》「宋天機」身份在《愛．回家之開心速遞》現身時笑說︰「我對咗『送水輝』（許家傑）三年喇，我覺得加入『宋天機』都幾有新鮮感。（大小姐幾時結婚？）我唔係咁想，因為TVB劇一出現BBQ或者結婚，多數都係結局，我唔想《愛．回家》完。」身旁的許家傑即笑言︰「咁繼續努力煮碗麵你食住先！」
撰文︰Pauline
攝影︰林良明
編輯：陳禮恒
美術：梁政敏