高海寧（高Ling）近日兩劇齊齊出，《殺手》和《迷網》都有佢份，TVB特別製作一條以「 高海寧『峰』芒初露時 」為題嘅短片，首度公開高海寧08年選香港小姐嘅面試片段。片段中，21歲嘅高Ling一把長黑髮，樣子清純，當年被傳媒大肆報道。第二次面試要佳麗著上泳衣示人，高Ling玲瓏浮凸嘅身材非常突出，故當時被睇好係三甲熱門。
(Big big channel短片截圖)
片中決賽嘅泳衣環節，高Ling被評審問媽媽係南京人、爸爸係香港人，點解走去南京搞咁多嘢？高Ling爽快回答：「我爸爸去做生意...緣份注定咗父母喺南京相遇，之後生咗我。」
(Big big channel短片截圖)
{{hket:inline-image name="14.jpg"}}{{/hket:inline-image}}
(Big big channel短片截圖)
高Ling最終喺決賽五強止步，原來對佢而言係如釋重負。 高Ling曾經喺節目度講過一直冇打算選港姐，反而高媽媽有個歌手夢，高媽媽將自己嘅心願投放咗喺自己身上。當初高海寧為畀心機讀書，堅持唔選，後來親友的鼓勵加上爸爸說服，最終鼓起勇氣挑戰，高Ling笑言：「我嗰陣讀緊書，爸爸起初都唔贊成，不過聽到當年外景係去加勒比海，爸爸就話可以當係去旅行。
(《兄弟幫》電視截圖)
高Ling透露參選時有人曾經唔滿意佢曝光率太高，不斷排擠佢；同一時間，佢又被網民質疑隆胸，令佢當時壓力好大，佢話：「我冇呢個（入三甲）心態，因為好驚、好唔開心，只係想快啲完。選完好多女仔入後台喊，覺得選唔中，但我係：『終於完喇，我可以做返自己』。」
(《兄弟幫》電視截圖)
入行後，高Ling曾因身材好被定型為花瓶，一度壓力爆煲而患上抑鬱症。佢曾經覺得自己唔適合做藝人，更諗過退出娛樂圈，但自知冇工作經驗、學歷不高，轉行都有困難，所以決定留低繼續發展，希望做出成績。
近年高海寧有份演出多部作品，除咗依家播緊嘅《殺手》同《迷網》外，仲有《C9特工》、《反黑路人甲》等緊陸續播出。上年，佢有幸夥拍張智霖，拍攝邵氏有份投資嘅賀歲電影《非凡三俠》，依家又拍緊《七公主》，演出機會愈來愈多，高Ling要繼續加油！
撰文：張芷晴
責任編輯：楊安莉