梁卓偉買餸當鍛練 籲平常心應對疫情

疫情持續，大家都要調整生活習慣，小心為上。黛安知道，香港大學醫學院歷來最年輕院長、現年47歲嘅梁卓偉，就好注重健康，包括經常去健身中心做運動，但佢話而家都改為每日行樓梯，更將每周到街市買餸當成「舉鐵」咁鍛練！

梁卓偉最近接受馬會刊物《駿步人生》訪問，佢話疫情下多咗食住家飯，並負責去街市買餸由外傭煮，「每周買1次餸，菜、肉、魚，通通買齊。」雖然飲食更健康，但佢話因為鍾意做嘢，以致工作多、生活少，所以做唔到work life balance，未夠健康。

講到市民抗疫超過半年，部分有人或開始有啲攰，佢就話呢個時候更需要發揮阿Q精神，苦中作樂，「盡量做到平常心，我認為香港人喺呢方面也很強。」原來梁卓偉除咗行醫，音樂亦好了得，讀中二已達鋼琴演奏級；佢喺訪問中就揀咗意大利著名歌劇《杜蘭朵》（Turandot）入面嘅歌詞Vincerò勉勵大家，意思係「我將得勝」，「我希望用這歌詞勉勵學生、朋友、香港人，再辛苦的日子都會過去。」