孖好姊妹組「港普F4」 蔡少芬被爆最愛叫人「死八婆」

蔡少芬（Ada）、朱茵、陳法蓉（Monica）與洪欣四位好姊妹，相交多年感情要好。四人雖然在內地發展多年，但一口港式普通話依然「保持水準」，經常被網民取笑。不過她們以特色「港普」自豪，不但組成女團「港普F4」，更互爆私下搞笑一面。

蔡少芬（Ada）、朱茵、陳法蓉及洪欣組成全新女團「港普F4」，發揮港普精神。日前四人扮得靚靚拍攝造型照，原來私下經常聚會的她們，今次竟是工作上首度合作。洪欣說︰「雖然我哋之間分別合作過，試過一齊登台唱歌跳舞，但四個齊人合作，真係第一次。」Ada聞言得戚說︰「係呀，佢哋三個今次好開心可以同我合作，係對佢哋最大嘅福氣。」

雖然港普口音經常被取笑，但四人毫不介意，反而認為可以增加人氣。朱茵說︰「幾好㗎，一講港普就記得我哋四個人，Ada去拍戲同埋綜藝節目時，大家一聽到佢嘅港普，就會諗起我哋其餘三個。」Ada更被三個好姊妹「爆大鑊」，朱茵說︰「我哋平時私底下唔會叫咩F4，反而叫大家做『死八婆』！」洪欣附和說︰「係呀！係Ada嘅口頭禪嚟，佢叫個個都係『死八婆』！我哋無名㗎，有時都唔知佢叫緊邊個。」慘被「圍攻」的Ada即口啞啞，場面搞笑。

笑陳法蓉「男扮女裝」

陳法蓉則笑言因為大家感情太好，即使互叫「死八婆」也不會介懷︰「大家咁熟，先至唔會嬲，我記得曾經留長頭髮，Ada話我好似男扮女，佢老公張晉即刻好緊張話『Monica會嬲㗎』，我覺得第二個講就可能嬲，但Ada講我會覺得幾好笑。」雖然娛圈競爭大，不過四位好姊妹自言絕不妒忌對方，亦不會有心病。

撰文、編輯︰李潔盈

美術︰梁政敏