【聲明】港生活網站並無進行電話推廣活動

何遠東留家抗疫減十幾磅

發佈時間: 2020/07/22

「龍貓」何遠東加入TVB已有12年,近年憑劇集《降魔的》及《十八年後的終極告白》成功跑出,「肥仔」形象深入民心。他趁疫情期間在家中做運動瘦身,結果一個月減掉十多磅,成績理想,只因健康是福。

喜歡演戲的何遠東接受《晴報》電話訪問,大談瘦身經過,他笑言減肥並非一時衝動:「始終在疫情下都要搵啲嘢做,咁不如減磅啦,其實喺一個月之前已經開始,到依家算係有少少成果。(減肥初期是否覺得好「地獄」?)呢個就一定啦,做運動真係好健康,我踩單車機同做sit up,又上網跟教練做運動,最初只做到20分鐘,依家可以連續做個半鐘。」

阿東表示除了定期做運動,就連作息時間亦比以前穩定,他透露︰「只要唔使開工,都盡量留喺屋企,或者一星期返屋企兩次探下爸爸,最難忍口就係見到爸爸煮嘅餸,以前我一定會食清晒,一口氣食六隻雞翼,依家只係食兩隻,真係唔敢暴食!」

拒盲搶糧食日用品

記者笑問阿東會否擔心「肥仔」的可愛形象不保?他表示︰「塊面係瘦咗啲,最主要係去水腫,瘦咗十幾磅,腰圍減咗一吋多。最開心係着褲有好多位鬆鬆哋,今次真係減磅成功,但暫時唔使買過啲衫褲。」

阿東又自爆在家中囤積的即食麵和薯片,暫時要打入冷宮,他笑言︰「我唔會丟,萬一屋企無糧食,又真係實施禁足令嘅話,都仲有嘢『咬』呀,最多咪唔好望佢哋囉!」問他會否到超市入貨?阿東續稱︰「我從來唔擔心無糧食,喺香港有錢就一定有嘢買,我相信即使實施禁足令,商舖都會維持有限度服務。」

採訪︰Pauline

編輯:陳禮恒

美術:梁政敏

何遠東留家抗疫減十幾磅

何遠東希望疫情盡快過去,大家可以回復正常生活。(IG圖片)

何遠東留家抗疫減十幾磅

阿東最愛爸爸煮的餸,大讚父親是心目中的廚神。(IG圖片)