【零售業寒冬】無印美國宣布「拜拜」 香港魔咒有無機會化解？

疫情持續並有惡化迹象，為本港零售業帶來核爆式傷害，唔少品牌或店舖都捱唔住紛紛結業。但講到「結業界」嘅翹楚，無印良品都算係數一數二，事關佢喺香港已經結業過兩次，第3次經營至今，會否因為一場疫症而三度敗走，尚係未知之數。不過最近無印良品美國分公司就率先向法院申請破產。其實數下數下，無印一路都有唔少「黑仔」事件發生：

屋漏兼逢「暴雨」的美國業務

無印良品嘅美國子公司「MUJI U.S.A」早前向美國法院申請破產保護，成為其中一間不敵新冠肺炎壓力嘅企業。其實美國無印嘅營運狀況本身就麻麻，過去已經連續3年虧損，單係過去1年就虧損咗大約1,000萬美元。連社長都承認低估咗美國電子商務嘅發展速度，開設太多大型實體店更成為沉重嘅營運負擔；已經五癆七傷嘅身體再加一個疫症爆彈擲落嚟，有乜辦法唔死？不過社長強調唔會出售美國業務，將來會捲土重來咁話喎！

「屢進屢敗」的香港魔咒

1992年首度來港開店嘅無印，因總部改變策略，年幾貨仔就結業離場。1995年再次來港發力，仲開咗4間分店，本來生意唔錯，點知1998年又撞正亞洲金融風暴，令無印喺日本同亞太區生意大受打擊，結果又係撤走收場。不過佢哋對香港似乎有份情意結，冒住第3次敗走嘅風險都要再博一鋪，結果2001年4月三度重臨香港，喺沙田開設5,000呎旗艦店；其後分店愈開愈多，最近更加喺九龍灣開埋全港最大、佔地24,000呎嘅無印「超市」，可算係苦盡甘來！希望佢今次可以打破「屢進屢敗」的魔咒吧！

{{hket:inline-image name="0722WLfeaturepageOK2.jpg"}}{{/hket:inline-image}}

▲無印在港「三進兩走」，今次會否成為例外？

正印不及「山寨」王

明明係受害者卻被反咬一口，會係咩心情？2015年，內地公司棉田公司及北京無印良品公司控告日本無印良品「侵權」。追溯返2001年4月，當時海南南華實業貿易公司成功註冊「無印良品」商標，可用於特定商品。其後商標喺2004年轉讓俾棉田公司，而該公司就投資喺2011年成立嘅北京無印良品公司。之後就發生控告日本無印侵權嘅事件。內地法院認為「被告」喺浴巾、面巾、浴室墊等使用與涉案商標近似嘅標識，侵犯「原告」嘅商標專用權而判日本無印敗訴。正版不服上訴但被駁回，仲要賠償「原告」62.6萬人仔！你話咁樣同搶劫有咩分別？

{{hket:inline-image name="0722WLfeaturepageOK3.jpg"}}{{/hket:inline-image}}

▲如果唔仔細辨認，一般人根本睇唔出山寨同正版有咩分別。

撰文：何本輝

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/