【疫情下悲歌】周三起全日禁堂食 疫情下港人蹲街邊開餐 網民細數7種職業難開飯

繼行政長官林鄭月娥早前宣布，食肆晚市不可堂食後，政務司司長張建宗今日（27日）交代新一輪防疫措施，包括全日禁食肆堂食，將於本周三（29日）起實施。有網民則認為，晚市禁堂食已令外賣員、地盤工、清潔工等人員「難開飯」，買外賣後需在路邊直接「開餐」，擔憂全日禁堂食會令他們的情況更慘。

有網民日前在Facebook群組貼出照片，表示在政府規定食肆傍晚6時後不可堂食的規例下，一名男子在快餐店買外賣後，蹲在食店門外除口罩「開餐」，事主不禁在帖文中揶揄「冇咗堂食唔緊要」，隨即引起網民熱議。

外賣員：百忙中路邊「開餐」

一名自稱任職外賣員的男網民表示，以其工作為例，經常只會在一些無訂單的空檔休息食飯，惟現時晚市不設堂食，買外賣回家又不夠時間，只得像相中男子一樣直接在路邊「開餐」，希望大家在街上目睹類似情況能多加體諒，

「我認為每人咁做一定係有個人苦衷，但絕對係無人會想發生咁嘅事，亦希望各位唔好歧視我哋呢啲焗住喺街邊除口罩食飯嘅朋友，老老實實我哋唔係怕『中招』，係怕唔知自己『中招』再害到其他街坊。」

有其他外賣員和應指：「我已經進化到揸電單車，左手食包右手揸車，得幾分鐘抖嗰陣，食咩都唔夠時間，去個廁所都無咗」、「有日我開完工要坐電車轉區繼續開工，因為無時間所以惟有買咗個漢堡（包）焗住喺電車食，我知疫情大家都驚，但我有得揀都唔想喺車食㗎」。

車長匿隱閉處「開飯」

有網民則認為，受「禁堂食令」影響，司機、零售業人員、地盤工、清潔工、速遞員和機場人員等人士恐怕亦「難開飯」。有人指曾目睹巴士車長在街邊就地「開飯」，「我見到啲車長要坐喺啲隱閉處地下食飯」、「的士司機見最多，一係就喺返車入面食，一係就企街食」。

零售、機場人員夜收工

有自稱任職於百貨公司的網民指，自己收工時間晚，通常買外賣後「都係出面搵個位食」；亦有人指，自己在機場上班，放工時間晚，乘車回家亦要花上兩小時，要不在巴士上解決，不然就是餓兩小時才回家食飯。

地盤工、清潔工、速遞員捱熱「開餐」

另有網民指，在攝氏30多度下，清潔工、速遞員等人士本身無特定休息或用膳場所，地盤工工作環境日曬雨淋，食肆禁堂食恐令他們失去唯一乘涼的地方，「最近開工唔係咁仲可以去邊度食，總好過喺地盤食」、「做派件呢啲工係好辛苦架，又熱又係咁行路」。

另外，亦有網民透露，自己返夜班或家住偏遠地區，也不時需在街上開餐，「我住得遠但又好肚餓，去咗後巷食嘢」、「試過收工轉場做嘢，好肚餓又唔畀堂食，買咗個包上到車又唔食得，最後落咗車之後走咗去後樓梯食」； 更有人指，商場座椅被人「24小時霸住」，公園又有不少人吸煙，要找到一個合適的角落用餐也殊不容易。

「限聚令」收緊 全日禁堂食

包括政務司司長張建宗等多名高官今午（27日）召開記者會，交代最新一輪防疫抗疫措施細節。相關措施大致有4個項目，包括限制全日禁止食肆堂食、將體育場館及泳池納入禁止營業處所種類，與及將現有之4人「限聚令」進一步減少至2人。措施將於今日稍後刊憲，並於本周三（29日）起實施，為期7日至8月4日。【查看更多】

延伸閱讀：食煙、做運動可豁免？可在公園食飯？一家三口不可出街？限聚令+全面戴罩令6大Q&A

每朝索取《晴報》：精明生活．健康家庭．開心娛樂

撰文：蘇麗儀