盤點自從港人進入「WFH+禁堂食」時代後，屋企不知不覺會多咗啲乜嘢呢？最後一樣好有親切感（簡單感同身受）。
1）極速入屋氣炸鍋
氣炸鍋絕對係近呢年最受歡迎嘅家電，沒有之一。疫情下WFH同禁堂食，更加令佢銷量大增，差唔多每一個網購平台都係Hot Sale。氣炸鍋好處大家都知，就係乜都可以放入去整熟嚟食，但某程度上亦有份造成下一樣要介紹嘅嘢。
健康財富貼士：氣炸鍋有平有貴，由300蚊至2千幾蚊都有，唔少人先買平貨試玩，嫌太細愈換愈貴。咦，乜咁似買樓嘅？
▲氣炸鍋慳水慳力，煮嘢食簡單咗好多，唔怪得銷量咁勁！
2）求其煮嘅早午晚餐
唔係個個都做到全職C9㗎，要知道日煮三餐，同打份工基本上無乜分別。而家要在家返工，聽日起Lunch都無得堂食，如果唔叫外賣，就要諗煮乜，所以即食食品好似餃子同即食麵銷量都多咗唔少。有餃子食都算唔錯喇，有唔少平日唔多入廚嘅人士，發揮「Less is more」精神，以極短時間煮出簡約精緻嘅「清蒸蟹柳」、「真．乾炒公仔麵」、「原粒車厘茄炒蛋」等傳說「WFH料理」，佢哋屋企人有福了。
健康財富貼士：點求其整都好，最緊要熟！
▲傳說中嘅「真．乾炒公仔麵」！
3）成日話用嘅瑜珈墊
（想像中）只需要一張瑜珈墊，即使係運動「初哥」都可以喺屋企輕鬆做運動㗎，配埋RingFit就更加完美添！（現實中）張瑜珈墊買咗之後，只係頭兩日開嚟用過幾次，之後就卷埋「攝」喺屋企唔知邊度。
健康財富貼士：瑜珈墊淘寶最平幾十蚊有交易，多啲拎出嚟用啦，買嚟墊腳都抵。
▲老老實實，買咗返嚟之後有無用過？
4）最正路多咗嘅水電煤
係炎炎夏日仲要WFH，唔開冷氣真係好難頂，如果喺埋屋企煮嘢食，煤氣用多咗唔在講，洗食材洗碗亦都用多咗水，好肯定水電煤費一定會多咗，當中冷氣電費係最襟計，咁醒埋你 >冷氣慳電7大貼士< 啦！
健康財富貼士：如果收到張單，覺得水電煤唔知點解貴咗好多，係可以向相關機構申訴㗎！好似水務署之前就有唔少用戶話 >水費暴升<，向區議員投訴！
▲WFH開冷氣電費都幾襟計！
5）癲婆
講緊嘅係在職媽媽。「唔係吖，在家工作唔係仲多咗親子時間咩？」哈！針唔拮到肉點會知痛？當一個阿媽WFH，仲要面對子女「停課不停學」嘅日子，簡直係過緊非人生活。小朋友精力旺盛（如果兩個或以上仲慘），又無得出去玩，喺屋企日嘈夜嘈，影響工作進度。「救命！其實我係想返Office！」可能係呢班在職媽媽嘅心聲！
健康財富貼士：即使在家工作，最好都係有返個時間表，嘗試抽一啲中午「lunch Time」嘅時間先同子女玩，等佢哋習慣呢個模式。
▲在職媽媽WFH之餘仲要睇住仔女，好容易變癲婆。
6）愈來愈大同圓嘅肚腩
轉咗WFH之後，連行落街搭車返工呢項「運動」都無埋，日日食完飯就坐喺度開工，而家連Lunch出街食都無埋，唔肥就有鬼。仲有，以前返Office通常等到下午茶先落快餐店食個茶餐，而家要留喺屋企餐餐食外賣，食量反而仲多咗。
健康財富貼士：早前HKTVmall推出 >「100%在家工作」計劃<，講到明唔准員工出街食飯。點樣Check員工有無出街？其實愈來愈肥美嘅豬腩肉，就係無周圍出街嘅鐵證啦！
▲Stay@Home無周圍出街的鐵證！
撰文：唐婉琦
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/