新冠肺炎疫情第三波在市區大爆發，政府下令食肆全日禁堂食，僅可以做外賣，令不少食肆生意再急跌；圈中有不少開設餐廳的藝人紛紛急謀對策「止蝕」，而在尖沙咀開設蠔吧的黃宗澤（Bosco），昨日接受《晴報》訪問時，坦言餐廳生意已經入不敷支，但為保員工飯碗，仍會繼續支撑下去。
政府本月中實施「晚六朝五」餐廳不能提供堂食後，日前又宣布今日起全日禁堂食，只能外賣，食肆生意再次大受打擊。近日煞停拍劇在家抗疫的Bosco，昨日透露餐廳於兩星期前已推出優惠吸客，他表示︰「網上訂購同外賣都有七折，希望可以幫補下！不過呢排生意都跌咗七、八成，我哋間店喺商業區，晚上無乜人，只做日頭生意，依家都入不敷支喇，希望業主可以減啲租畀我哋。」
雖然經營情況嚴峻，但Bosco堅持不放棄，他說︰「執咗間餐廳，員工就失業，惟有撑住先，最緊要疫情快啲回落，日日過百宗確診真係擔心。」問他預料餐廳會蝕幾多錢？Bosco嘆了口氣謂︰「我都唔敢計會蝕幾多，愈計愈傷心。」
黃翊：唔可以太消極
在大埔開設茶餐廳多年的黃翊，坦言會跟廚師商量如何只做外賣生意，他表示︰「雖然隔籬有幾間舖今日無開，但我哋又唔可以太消極，所以點樣都會照做生意，不過淨係做外賣一定會有影響。我無心情去計損失幾多，一定好大，全香港食肆都一樣，唔好諗賺唔賺錢，夠畀伙計、燈油火蠟同舖租已經好好喇。」
至於17年投資中環西班牙餐廳LA RAMBLA的溫碧霞，同樣以積極的心態面對今次難關，她表示︰「餐廳會準備做外賣，好多人會落柯打，生意應該無咁好嘅，但唔緊要啦，應該向好嗰邊諗，希望限聚令只係一星期，最緊要疫情快啲過，唔好咁嚴重，大家唔使咁受各方面限制就好喇。」
而上周剛開新店、現擁有三間食店的李家鼎，為了維持餐廳生計，旗下餐廳均會設外賣，但他表示︰「蝕幾多就唔敢諗，因為諗起就頭痛。」至於開設火鍋店、點心及麵包店的林夏薇，昨日則透過短訊回覆︰「我在開工，全力配合抗疫，好多嘢都係未知數，所以都係等～抗疫，健康最緊要。」
撰文︰Pat
編輯︰黃寶恩
美術︰梁政敏