【全日禁堂食】鄭中基呼籲唔好影人街邊食飯苦況 帖文惹500人留言 網民掀起罵戰

新冠肺炎喺香港大爆發，連續8日單日新增逾百宗本地確診個案，至今個案已經達到3003宗。今日政府開始實施新一輪防疫措施，食肆首日全面禁堂食，唔少喺戶外工作嘅打工仔要被逼喺室外用餐，例如地盤工友、清潔工人等。不過，今日中午時分，香港多個地區落大雨，令到一班打工仔只可以四處尋找用餐地點，最後喺巴士站等有蓋地方席地而坐。

{{hket:inline-image name="12.jpg"}}{{/hket:inline-image}}

(有線新聞截圖)

{{hket:inline-image name="111.jpg"}}{{/hket:inline-image}}

(無綫新聞截圖)

喺各大社交平台嘅群組，都會見到一幅幅令人心酸嘅畫面，不過鄭中基喺facebook專頁上載咗張相，相中寫住「並唔係每個人都可以有個空間靜靜地食飯。懇請大家喺街見到人食飯嘅話，就俾（畀）啲空間，唔好影相甚至po上網。人人嘅尊嚴都應該受到尊重。」最後佢仲話：「就嚟到食晏時間啦，其實好多工種嘅人都冇地方食飯，所以大家互相體諒多啲啦！辛苦搵來自在食，尊重自己尊重其他人」

經過鄭中基提醒，唔少網民都表示明白，承諾唔會再影相，不過有部分網民就因為影唔影相而掀起罵戰。

{{hket:inline-image name="11.jpg"}}{{/hket:inline-image}}

(鄭中基facebook圖片)

有網民認為打工仔喺街邊食飯嘅情況可以反映社會問題，亦係歷史一部分，影相可以幫助大家紀錄呢個情況：「呢個係香港歷史一部分，絕對有需要被記錄下來」、「唔影到樣有咩問題? 人地行得正企得正咁食飯，驚咩被人影?」、「唔影佢相，就代表佢企喺街食飯食得好有尊嚴？邊個搞到佢哋咁狼狽？唔應該指責提出問題嘅人！」等等。甚至有人反駁鄭中基咁樣呼籲只係掩耳盜鈴：「唔講就冇發生？」、「NGO的宣傳刊物是否也要禁？」

{{hket:inline-image name="16.jpg"}}{{/hket:inline-image}}

(鄭中基facebook截圖)

另外有網民就認同鄭中基講得好有道理，認為影相嘅人冇尊重過當事人，就算幅相已經打咗格仔，或者只係影背影都唔好：「有人係帶住睇到世界奇觀嘅心態，影張相分享畀人睇」、「唔好人哋講咩都起槓反擊啦」、「真係好多人影，又冇問過人就放人上網，好唔識尊重人」、「冇得喺餐廳比較舒服咁食一餐，已經好陰功，依家啲人仲要話影人相，唔出樣冇問題，換轉被影嘅係自己或身邊嘅人時，睇你仲有冇講得咁輕鬆，放過人積吓德。」、「很多人覺得有自由影相，但冇自由唔被人影相？」

{{hket:inline-image name="15.jpg"}}{{/hket:inline-image}}

(鄭中基facebook截圖)

鄭中基除咗呼籲大家唔好影人相，日前佢上載咗條Youtube片，呼籲大家要在家工作，仲叫大家隔住熒幕睇佢短片就得，解吓悶！好貼心。

{{hket:inline-image name="13.jpg"}}{{/hket:inline-image}}

(鄭中基YouTube短片截圖)

{{hket:inline-image name="14.jpg"}}{{/hket:inline-image}}

(鄭中基YouTube短片截圖)

撰文：張芷晴
責任編輯：楊安莉