【聲明】港生活網站並無進行電話推廣活動

恨拍《殺手》續集 黎耀祥龔嘉欣打上癮

發佈時間: 2020/07/31

無綫劇集《殺手》將於下月7日播映大結局,昨日黎耀祥、龔嘉欣、高海寧、江嘉敏、江美儀等一眾演員出席「終極殺手鐧」宣傳活動,大玩各項體能比試,一決高下。提到《殺手》收視成續好,在劇中打餐飽的祥仔與嘉欣,均希望可以開拍續集,即使辛苦操肌拍打戲也心甘情願。

一眾演員昨日在活動上比拼體能,高海寧及譚嘉儀不約而同穿露腰裝玩呼拉圈,譚嘉儀更邊玩邊除外套,相當搶鏡。大會同時公布《殺手》第16集七天跨平台總收視31.3點,逾二百萬人收看,成績甚佳。黎耀祥與龔嘉欣對於收視佳績十分高興,雖然劇中打戲連場,拍得相當辛苦,但仍感到相當值得。祥仔說︰「除咗收視之外,口碑都好重要,動作戲最緊要係觀感,兩個人對打好睇,官能刺激係最吸引。」

打女上身的嘉欣笑說︰「我拍打戲拍到上癮,再拍動作戲都OK,希望再同祥仔合作。」在旁的祥仔笑言︰「但夏天拍打戲太辛苦啦,冬天拍應該會好啲。」他們希望可以開拍續集,祥仔提議說︰「可以用殺手做題材,拍成一系列,前傳或延續都得,好似日本漫畫咁有連貫性又得。死咗嘅角色,可以用第二個造型翻生再拍。」他笑說若觀眾喜歡,他可以努力操fit,再拍打戲騷肌肉。

靠網上廣告維持收入

另外,提到疫市令不少藝人工作大減,嘉欣說︰「有啲剪綵之類嘅活動都取消或延期,不過疫情緩和最緊要,錢可以再搵過,好彩接多咗網上廣告,都算係cover之前取消嘅工作。」在旁的祥仔聞言,即報以羨慕的眼神笑說︰「咁你真係算好幸運!我好少玩網上平台,依家就業不足,我都想去勞工處搵工。」提到政府今日放寬早午市堂食,他們指不少戶外工作者沒地方吃午餐,所以恢復午市堂食是好事,最重要大家做好個人防疫工夫。

採訪︰Pauline

編輯︰李潔盈

美術︰梁政敏

攝影︰林良明

恨拍《殺手》續集 黎耀祥龔嘉欣打上癮

譚嘉儀(左)玩住呼拉圈脫外套,比同樣露腰的高海寧更搶鏡。