後悔無學煮中菜 鄭欣宜再嘗「肥姐味道」爆喊

鄭欣宜日前為彭秀慧主持的香港開電視節目《自煮女人最漂亮》打頭陣擔任嘉賓，除了大談女人保養心得，又即場下廚炮製中式甜品雙色湯圓。欣宜談到去年有機會再品嘗媽媽沈殿霞（肥姐）生前的拿手小菜，令她在餐桌上感觸爆喊。

節目中，欣宜與彭秀慧一齊炮製湯圓，不過平日廚藝了得的欣宜，卻被中式甜品考起。她笑說︰「我好鍾意下廚，但我係鑽研西餐，我哋今次整中餐，所以我係零概念。」彭秀慧透露曾到欣宜家中吃美味餃子，欣宜指媽媽肥姐是上海人，該款餃子正是沈家的家傳之寶。

欣宜大讚肥姐廚藝出色︰「不過媽咪好忙，好少親自下廚。記得一年前，有幾位朋友去我屋企食飯，我請工人姐姐幫手煮，佢話『煮你媽咪嘅油泡蝦』，我無諗過佢識煮媽咪嘅菜式，而且味道一模一樣，我食嗰陣忍唔住爆喊，因為細個無諗過會再無機會食到呢味餸，所以無諗住去學，反而去咗學西式甜品，因為屋企人唔識整，咁就大家唔使爭，每人有一樣強項。」

自嘲身長腳短

另外，欣宜自爆有三項缺點︰急性子、身長腳短及經常質疑自己。她自言個性非常心急，容易發自己脾氣，但大家又誤會她向別人發脾氣。她又不滿自己身長腳短，連彭秀慧也曾經取笑她。

至於第三個缺點，欣宜直言會經常質疑自己，會有莫名的恐懼，她說︰「可能好多人覺得，乜欣宜唔係覺得自己好靚㗎咩？唔知點解大家咁諗，但我企喺台上唱歌時，都會覺得自己唱歌唔及其他人，亦唔及其他人吸引，所以建立自信嘅第一步，就係要呃自己去喜歡自己。」

撰文︰Pauline

編輯︰李潔盈

美術︰Simon