29歲的陳凱琳（Grace）上周一為丈夫鄭嘉穎誕下第二胎，取名鄭承亮（Yannick），兩夫婦昨午在社交網po相報喜，照片中的Yannick鼻高高、面尖尖，非常可愛。Grace昨午回覆《晴報》稱︰「Rafael做咗哥哥，佢見到BB會靜靜哋幫我哋望住BB、摸下BB，真係（令我哋）非常安慰。」
Grace去年為老公鄭嘉穎誕下大仔鄭承悅（Rafael）後，今年五月宣布再度懷孕，50歲的鄭嘉穎昨午宣布再為人父，他在IG上載一家四口的家庭照，公告細仔Yannick已經出世，並留言︰「細佬來了，母子平安！非常感恩！」
成功兩年抱兩的Grace也在IG發相，照片中這位靚媽抱着細仔親吻，溫馨滿瀉。她並留言指細仔的誕生日子比預期早。陳凱琳其後受訪時說︰「好開心同大家公布呢個好消息，BB係上星期一、7月27日出世，我同BB都安全回家，大家都好融洽！」
待產譚凱琪盼有伴
她又透露做哥哥的Rafael好乖巧︰「佢見到BB喺度，都靜靜哋幫我哋望住BB、摸下BB。」她又指對比第一胎，今次有充足心理準備，因此心情不錯︰「成件事好順利同喜悅，多謝大家祝福，嚟緊多啲休息，希望大家都安全留喺屋企，我呢個月坐月都會留喺屋企，多謝大家關心。」
再做爹哋的鄭嘉穎亦向傳媒透露，Yannick已改名「鄭承亮」，又指細仔似老婆，鼻高高、面尖尖。他又稱︰「最緊要佢開開心心咁成長，已經心滿意足。」
至於Grace的好姊妹譚凱琪亦正在懷孕，她回覆本報時稱︰「我都知道佢生咗，之前Baby Shower已經同佢慶祝過。我期待BB快些出世，將來又有個伴！」另外，多位圈中人包括胡杏兒、汪明荃、龔嘉欣、何雁詩、楊秀惠、唐詩詠、陳山聰及黃翠如等，也分別在Grace和鄭嘉穎的IG留言恭喜。
撰文︰Steven
編輯︰黃寶恩
美術︰Simon