【新冠肺炎】被連問新冠肺炎接觸史感心煩 男子自爆去診所真正目的

本港新冠肺炎疫情持續，市民到診所求診時， 或需透露接觸史以助診症。一名男子日前到診所就診，被問及新冠肺炎接觸史時，全部回答皆非；惟至女助護詢問最後一個問題時，男子疑被問到心煩，突然「自爆」到診所的真正原因，被網民揶揄「食咗誠實豆沙包？」

一位診所女助護上周六（1日）在其Facebook專頁「診所低能奇觀」中發文，表示日前有一名男子到診所就診，並「自動自覺」拿出身份證到登記處登記；女助護接過其身份證後，循例詢問對方新冠肺炎接觸史，

女助護：「14日內有冇離開過香港？」

男子：「冇」

女助護：「有冇家人接受緊家居隔離？」

男子：「冇」

女助護：「住緊嘅大廈有冇確診個案？」

男子：「冇」

女助護：「有冇曾經去過有確診個案嘅食肆？」

男子：「冇」

女助護：「有冇接觸過確診者或隔離人士？」

男子：「冇」

女助護：「最近有冇發過燒？」

男子：「冇」

其後，女助護詢問最後一個問題，形容「就到終點啦」，並問及對方：「咁最近有冇流鼻水、咳有痰、肌肉痠痛、肚屙？」；此時，該名男子卻疑被問到心煩氣躁，突然「自爆」：

「冇呀！咩都冇呀！我嚟呃假紙咋！冇病㗎！」

女助護形容自己當時「靜了」，該男子則略顯尷尬，馬上致歉：「唔好意思，頭先語氣重咗少少......」，女助護聽後只稱「唔緊要」，繼續進行登記。

然而，該名男子疑為自己「呃假紙」一事感緊張，連忙問道：「係咪頭先講過嘅嘢你都會寫低呀？」；女助護則指僅是作個記錄，「其他嘢我唔理嘅」。至最後，該名男子彷彿仍對自己的言行感抱歉，再次表示：

「頭先我一時語氣重咗少少，你唔好怪我呀。」

不少網民看到帖文後，紛笑稱涉事男子「夠誠實」，留言表示「食咗『誠實豆沙包』？」、「呢位演員好老實」、「如果個個病人都咁誠實就好啦」；亦有人讚賞該名男子頗有禮貌，「其實佢人品唔錯，呃假紙都肯講，又會講聲對唔住」、「識道歉，唔錯唔錯」、「咁好禮貌，畀（假紙）佢啦」。

文章獲「診所低能奇觀」授權轉載

每朝索取《晴報》：精明生活．健康家庭．開心娛樂

編輯：蘇麗儀