台灣歌手潘瑋柏早前宣布迎娶年輕13歲、有「內地最美空姐」之稱的Luna，女方隨即被起底，過往的生活曝光，流出疑似喺夜店做DJ嘅性感相，更被指曾經同台灣男星陳柏霖同房祖名夜蒲！潘瑋柏即刻出嚟「護妻」，指部分網絡用戶針對佢同Luna散播嘅謠言及人身攻擊，一定會依法追究。
（潘瑋柏微博）
潘瑋柏報喜後，大陸萬達集團董事長王健林嘅獨子王思聰發文：「我佛（服）了，Amy姐還是厲害， 身邊兩名大將，一位嫁給郭富城，一位嫁給潘瑋柏，太有實力了。」王思聰向來跟娛樂圈有緊密關係，黃曉明、吳亦凡等都係好友。佢呢個發文令到網民都好好奇，一查之下發現「Amy姐」同Luna以及郭富城老婆方媛有關係。
（網上圖片）
有指「Amy姐」係「Pick Up Artist（PUA）天王嫂訓練營」嘅揸Fit人， 旗下嘅女網紅會接受專業特訓，務求成功「撻着」天王巨星。「Amy姐」同方媛以及Luna嘅合照曝光後，令外間對佢哋嘅關係有無限聯想。
（微博圖片）
有網民聲稱熟悉訓練營運作嘅網民，指訓練營一直存在於北京及上海，學員要接受4個部分的專業訓練。
第一步-整容
該網民表示所有學員都去同一間醫院「變臉」：「這是必須的，也就是為甚麼看到這幾年天王娶的都是網紅臉。」
Luna係標準網紅樣。（微博圖片）
第二步是-安排攝影師為學員到指定的地點影「網紅照」
學員會輪流穿戴同一件衫及手袋；買酒店點心當係自己炮製再用嚟打卡拍照，目的係營造賢淑、有內涵形象。有網民比對唔少Luna嘅舊照，無論拍攝角度同背景都同其他網紅幾乎同出一轍。
Luna同另一位網紅「撞相」撞到嘭嘭聲。（微博圖片）
唔知以為係同一個人呀！（微博圖片）
歎個Afternoon tea都有標準動作。（微博圖片）
第三步—去明星名人蒲點或私人派對「抄牌」
學員攞到目標人物聯絡方式後，就由導師教路點傾偈，令關係升級。爆料網民指：「怎麼釣着對方，怎麼讓對方上釣最終無法自拔。」
最後一步—說服目標人物於社交網等公開表白
教學員用技巧令目標人物公開關係，更要提到學員嘅名。郭富城及潘瑋柏咁啱得咁橋都係喺網上「報喜」，激罕公開另一半身份。
（潘瑋柏微博截圖）
（郭富城微博截圖）
根據網文介紹，訓練營收費以「按揭和提成」方式收取：「一開始或許沒甚麼錢（整容就要先花一大筆），所以學費先欠着」。目標人物上釣後，導師先會要求交學費，根據目標人物身家收費高低。學員氹到目標人物畀錢「買包包、食飯」等，再將錢轉畀導師。正式結婚後，仲會一次過畀清大筆尾數。
撰文:黃蘊姿