【散戶心裏有個謎】拆解恒大健康爆升原因 除咗炒概念仲有一個關鍵因素

早兩日恒大健康（00708）大灑金錢催谷旗下「恒馳」新能源車，但廣告寫明車款暫時唔會喺香港發售，為乜要大肆宣傳？睇返恒大健康股價走勢就知，短短兩個月股價就由6元水平，最高炒到去37元，狂升5倍，今日收市則報33.9元。

恒大健康原本發展健康產業，自從入股瑞典電動車公司NEVS股權之後，突然高調宣布主攻汽車業務，仲打算改名為恒大汽車，今個星期初發布「恒馳」6款新能源車之後，市值更加一舉升穿3000億元，成為香港上市車股中市值第一名，高過藍籌車股吉利（00175）約1,600億元近倍，亦超過內地電動車業龍頭比亞迪（01211）A+H股市值約2,400億元，最厲害係仲高過母公司中國恒大（03333）約2872億市值。

{{hket:inline-image name="0805WLfeaturepage492.jpg"}}{{/hket:inline-image}}

▲恒大汽車在內地發布6款電動車，覆蓋A至D所有級別。

相信睇到鋪天蓋地嘅廣告攻勢後，好少投資股票嘅人都會留意恒大健康，不過隻股股價已升咗幾倍，而家入市會唔會變咗高位接火棒呢？當然炒股就係炒消息、睇膽色，但如果係打算長線投資，就一定要睇實績、做分析。

恒大健康雖然公布咗「 恒馳」電動車系列，但未有公布生產同銷售計劃嘅時間表，不過表示力爭3至5年內成為世界規模最大、實力最強嘅新能源汽車集團，即係目標追趕電動車業龍頭好似特斯拉（Tesla）同比亞迪啦。

連一部車都未正式賣街嘅恒大健康，今年股價升幅仲勁過美股特斯拉（Tesla）。要知道Tesla上年全年一共出貨37萬部電動車，今年上半年亦出貨18萬部，更加連續4季錄得盈利。至於恒大電動車業務仲係起步階段，公司上年全年仲錄得44億元人民幣虧損。所以講業務實際表現，而家恒大健康唔好話同特斯拉比，就算同比亞迪都仲有好大一段距離。

{{hket:inline-image name="0805WLfeaturepage491.jpg"}}{{/hket:inline-image}}

▲恒大健康產業集團去年公布2018年業績。（資料圖片）

恒大健康爆升除咗炒概念，仲有一個原因要留意，就係股權結構。根據香港交易所中央結算系統（CCASS）資料顯示，恒大健康約75.27%股份在CCASS之外，即係恒大健康只有不到25%或21.37億股股份可以喺交易所流通買賣（俗稱「街貨」），當中大部分亦由證券商或基金持有，一般投資者及散戶持股佔股份總數不足5%。

所以簡單嚟講，就係恒大健康股份係由少數大股東持有，令恒大健康易被炒上，即係啲分析員成日講嘅「貨源歸邊」。事實上，證監會早喺2015年已經指出恒大健康股權高度集中，當時母企恒大連同另外18名股東，已合計持股93.37%股權。

下次再講投資者應該點樣正確解讀「貨源歸邊」。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/