【聲明】港生活網站並無進行電話推廣活動

14日隔離期滿 薛家燕防疫「花弗」Look風騷出關

發佈時間: 2020/08/06

早前新城電台出現新冠肺炎確診個案,於新城主持節目的薛家燕,立即留在家中自我隔離,並取消錄影工作。家燕姐在14日隔離期滿後,前晚「出山」到電視城錄影節目《流行經典50年》。開心出關的家燕姐以粉紅花仙子晚裝襯花花口罩,再加透明面罩及隨身攜帶消毒器,防疫工夫做到足。

薛家燕前晚大談隔離生活,她笑說︰「我未試過兩星期唔出街,連仔女都見唔到,佢哋整咗飯餸畀我,都係放喺屋企門口就走啦!」家燕姐坦言不習慣無得化粧,有日忍不住在家中set頭扮靚︰「我化晒粧,一個人喺屋企行嚟行去,唔想嘥咗就拍埋片。大女珊珊(石祐珊)喺美國,佢每日都打電話提我唔好出街,仲叫工人唔准我去街。」

家燕姐表示已做了兩次新冠病毒檢測,報告均為陰性,出關後即相約家人見面,去兒子家中為新抱慶祝生日,認真廿四孝奶奶。她坦言「出關」非常開心︰「第一日出關,我即刻去修甲、整頭髮、入貨,使咗幾千蚊,然後開開心心同新抱慶祝生日。」她又表示新城十分尊重她的意願,讓她暫時繼續在家中以網上直播形式主持節目。

姜麗文見舊愛鄭俊弘唔尷尬

另外,家燕姐自言在隔離期間反思人生,決定疫情過後會減少工作,多抽時間跟仔女及男朋友去旅行,享受人生。她笑說︰「我有呢個決定,最開心係男朋友,不過佢都怕我得個講字。」

至於同場的姜麗文前晚與譚嘉儀合唱,問姜麗文會否跟同場的舊愛鄭俊弘合唱?她即愕然說︰「吓!點解呀?」她自言和鄭俊弘並非第一次同場,所以不會覺得尷尬;而且她認為工作還工作,日後若有機會真的合唱也可以,因大家都熱愛音樂。問她是否已放下舊情?她說︰「當然,咁佢就快結婚,我自己都就結婚,而且過咗咁多年,唔會有任何負面嘢。」她又透露自資製作兩首歌曲,但因疫情暫時擱置推出︰「我儲咗四年錢先出到,我無諗會唔會蝕本,最緊要推出嘅時間適合。」

採訪︰Pauline

編輯︰李潔盈

美術︰梁政敏

攝影︰林良明

14日隔離期滿 薛家燕防疫「花弗」Look風騷出關

姜麗文已完全放下與鄭俊弘的舊情,也會考慮將來合作。

14日隔離期滿 薛家燕防疫「花弗」Look風騷出關

一眾歌手藝員前晚錄影前,均戴上口罩保障彼此安全。