【保就業千奇百趣】「零」僱員企業都成功申請到？話你知到底咩玩法

「保就業」計劃推出以來，千奇百趣事件層出不窮，點知怪事原來未見底，最新傑作係「零僱員」竟然都有資助！咦，筆資助唔係要嚟保住員工的嗎？而家無員工都可以申請到，到底係咩玩法？

政府早前公布咗「保就業」計劃第三批獲資助僱主。名單中出現嘅其中154名僱主，承諾受薪僱員人數竟然只有0人！佢哋獲得嘅資助金額合共超過455萬港元。資助額最高嘅3名僱主甚獲批超過10萬港元！到底點解會出現咁離奇嘅情況？

舊資料未及更新？

其中一間公司嘅負責人表示，有同事喺2月底離職，2月17日已有新員工返工，受僱第60日後即4月已遞交強積金計劃；但政府工資補貼嘅僱主名單仲未更新3月嘅承諾受薪人數，所以出現「零」僱員嘅記錄。

另一間公司亦有類似情況，發言人指公司申報領取工資嘅月份係舊年12月，當時仲有2名員工，但政府自動以3月計算僱員人數時，公司正值休業，當時員工已離職，故3月僱員人數為零，5月重開後已補請2名員工。 

僱主借機減成本？

有勞工團體批評計劃最初公布時就有漏洞，因為僱主可遣散原有較高薪嘅僱員，之後重新聘請人工較低嘅僱員，但就仍然符合資格獲批資助，僱主付出嘅工資成本仲低咗。該團體又話，現時已出現過百間「零僱員」公司，唔排除有僱主以此手法減省成本。

{{hket:inline-image name="0806WLfeaturepageOK2.jpg"}}{{/hket:inline-image}}

▲政府指「零僱員」的企業收取資助後，必須重新請人。

政府把關不力？

無論原因係點，事情的確已經發生咗，咁政府方面又有咩回應或補救措施呢？「保就業」計劃秘書處就解釋話，呢批僱主大部分聘用一或兩名僱員，早前申領補助時，僱員人數已變為零，但佢哋已承諾將資助全數金額用於支付僱員6至8月嘅工資，即係話，有關公司只要重新請人，就仍然符合申請資格。

不過秘書處都再三強調，呢批僱主必須喺重新請人後，將資助全數金額用於支付工資，同時為佢哋供強積金，否則會收回資助。秘書處仲話，喺處理呢類申請個案同發放資助後，會特別昅實呢批承諾受薪僱員人數為「零」嘅僱主，有需要時會派員進行實地視察。大家又即管睇睇政府之後係咪可以好好把關，以免公帑被濫用？

撰文：何本輝

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/