俗語有云：「唔做中，唔做保，唔做媒人三代好」，但偏偏Bob（林盛斌）就反其道而行，經常為身邊嘅朋友牽紅線。
（林盛斌IG）
日前Bob又有「成功案例」，仲破咗自己「個人紀錄」用咗短短兩日就撮合咗一對「有情人」，日前佢喺自己嘅社交平台有感而發：「都應該係我紀錄中最快手嘅一次，星期日介紹，星期二佢哋一齊咗！以後條路就睇你哋，希望你哋幸福快樂。點解我咁鍾意做埋呢d（啲）嘢？因為，見到身邊人開心，自己都會好開心。」
▲（林盛斌IG）
Bob自己同老婆仔女幸福，都想身邊朋友幸福，佢表示風水師陳定幫嘅老婆都係當年經佢介紹。雖然都有好多不成功個案，但不時見到「成功者」放閃，自己會戥他們開心；即使有啲只能做好友，Bob仍覺得為朋友製造咗「緣分」。
▲陳定幫(中)原來都係多得Bob先搵到真愛。(網上圖片)
喺圈中一向人緣好好嘅Bob一出Post即刻引嚟唔少藝人留言，有啲更加係Bob嘅「服務對象」，其中黃金盛女唐詩詠留言叫Bob開公司，但就畀Bob踢爆佢曾經「唔領情」：「你上次又唔幫襯！」
▲（東星娛樂）
▲（林盛斌IG截圖）
▲睇嚟胡定欣都將會受惠於呢個金牌媒人！幫緊你幫緊你~（林盛斌IG截圖）
▲胡定欣（中）單身多年，唔知咩類型男仔啱佢呢？（東星娛樂）
▲Bob都介紹咗男仔畀陳嘉桓（左），仲有Follow up添，全套服務！（東星娛樂）
▲陳嘉桓留言（林盛斌IG截圖）
到底Bob邊得嚟咁多筍盤？其實佢無時無刻都招收「會員」。2018年Bob時做「通波仔」手術，都不忘為幫佢做手術40歲嘅心臟科主診醫生「招親」：「事業有成，有上進心，絕冇不良嗜好，成熟，穩重，工餘時間熱心公益，我係女人會主動溝佢，而個重點係...........佢單身。咁點解佢會冇女，我相信主要係因為『悶』，我聽佢講解個手術同巡房傾計（偈）嗰陣我爭d（啲）瞓咗！各位姊妹，有需要PM我！」
（網上圖片）
唔少網民都叫Bob快啲開公司，好多人都留言話自己好有需要佢幫手，睇嚟Bob呢盤生意認真有得做呀！
撰文：黃蘊姿