近日，「大劉」劉鑾雄同甘比嘅囡囡Josephine劉秀樺，為東華三院舉行嘅「滑板藝術網上展覽暨慈善拍賣」活動設計滑板，劉嘉玲、楊千嬅、鄭秀文等都會參加。劉秀樺喺滑板上畫咗媽媽甘比心愛嘅卡通人物Pingu企鵝，黎姿見到都讚佢好有才華。甘比幫囡囡同滑板影咗幅相，有感而發咁講：「呢幅畫係佢小時候同我一齊畫嘅作品，當時畫咗我最鍾意嘅企鵝一家，幅畫令我哋諗起屋企人一起相伴嘅快樂。希望小朋友愛家人之餘，更可以多多關愛身邊不同嘅人。」
(甘比instagram圖片)
唔少網民都讚劉秀樺畫得唔錯，亦讚就嚟滿12歲嘅佢外表大個女咗唔少：「超級無敵可愛小美女」、「同媽咪一樣咁可愛」、「大個女，好少女了」從其他相片可見，劉秀樺臉上依然帶有baby fat，但笑容甜美，同媽媽甘比好似餅印咁。
(甘比instagram圖片)
劉秀樺自出世以來就好得爸爸劉鑾雄嘅疼愛，先後獲贈4粒7至16卡嘅稀有藍鑽同粉紅鑽，合共8億幾。此外，劉秀樺亦獲得爸爸贈送豪宅，價值高達4.6億，係位於渣甸山高士美道5號嘅大屋，年紀輕輕已擁有總共12億幾嘅財富。直到前年，劉鑾雄將12層樓高嘅豪宅命名為「秀樺閣」「 Josephine Court」，盡展父愛一面。
(甘比instagram圖片)
雖然劉秀樺出身豪門，但甘比想佢了解多啲普通市民嘅生活困難，所以經常帶佢去探訪劏房家庭、參與派米、賣旗籌款嘅公益活動，幫助老人、小朋友同殘障人士。受到媽媽份愛心影響，劉秀樺亦好樂於助人，曾將生意收入全數捐出。
(甘比instagram圖片)
事緣劉秀樺喺10歲時迷上玩「鬼口水（Slime)」，於是順勢搞埋「鬼口水」網店生意。爸爸劉鑾雄係網店Admin之一，而媽媽甘比就係員工之一。甘比除咗成日叫網民多多幫襯，仲喺旗下銅鑼灣嘅地標商場，揾咗個位畀劉秀樺擺部自助售貨機賣「鬼囗水」。
為咗宣傳產品，劉秀樺開咗instagram帳戶，不時拍低自己玩各式各樣「鬼口水」嘅短片，吸引到唔少網民留意，短短幾個月已得到5萬多名粉絲。「鬼口水」極受歡迎，經常售罄，最後劉秀樺首次創業即成功做出10萬蚊生意額。佢冇自己儲起，反而主動提出想捐錢幫其他有需要人士，最終將所賺嘅錢捐到爸爸劉鑾雄名下嘅慈善基金，非常難得。
(甘比instagram圖片)
{{hket:inline-image name="14.jpg"}}{{/hket:inline-image}}
(甘比instagram圖片)
{{hket:inline-image name="16.jpg"}}{{/hket:inline-image}}
(甘比instagram圖片)
撰文：張芷晴
責任編輯：楊安莉