【醫護辛酸】救護員直踩15小時無休息 怒轟市民濫用資源 「救護車唔係免費的士」

本港第三波新冠肺炎疫情持續，公立醫院壓力大增。日前有救護員發文大呻，疫情期間每日至少需當值15小時；而令他極之憤怒的是有市民濫用救護車服務，稍有不適便召車入醫院，導致加重醫護壓力，造成浪費社會資源，怒轟：「救護車唔係免費的士呀！」

市民濫召救護車服務

「救護車唔係免費的士呀，醫院唔係去渡假去休息既地方呀。」一名自稱是救護員的網民，今日（7日）凌晨2時許向Facebook專頁「公務員secrets」投稿，指出有部分市民感到「頭暈眼花」便急召救護車入院，以致增加他們的工作量，同時亦延誤其他更有需要的病人入院接受治療，

「二三百磅要我哋抬你落樓，我地唔係淨係服侍你一個呀，仲有其他二三百磅既要我哋抬呀！仲未計其他真係有需要嘅病人呀！」

行山中暑扭傷加重醫護負擔

「成日話同心抗疫，唔使返工就周圍去玩。」他又稱，雖然多名專家已經警告市民要多留家抗疫，但卻有人仍趁放假外出遊玩、行山，結果出現中暑、扭傷，又要醫院分散人手救他們，怒斥這些人雖口說支持醫護，但實際上卻沒有自制地留在家中，結果徒添醫療負擔：

「支持醫護靠把口㗎？......又話醫療負擔好重，點解重呀？咪就係你哋少少事走晒去醫院，醫院咪又係畀張病床你瞓，畀啲你平時睇醫生開嘅藥你，瞓醒無事又出院。」

當值時間變15小時一更 

事主續指，疫情爆發前，他們已經常沒有時間吃飯；如今工作量再增，當值時間更延長至14至15小時一更，形容「直頭收唔到工」，直言自己可能會因為工作量太大而猝死：

「咁樣落去我唔係中肺炎死就係做到猝死呀。」

他又補充當晚工作的辛酸史，除了將2名確診者送入醫院外，其餘兩程車均是接載「行得走得」的病人，無奈表示：

「踩咗咁耐未抖過......臨天光先有得合埋眼抖一抖......話口未完又去車喇。」

網民批評自私浪費資源

事主的遭遇獲不少網民同情，「救護員嘅生活真係唔係人過的」，紛紛指摘「自私人太多」、「真心希望大家唔好濫用救護車」。亦有網民批評在疫情爆發前，不時有市民在下雨天行山，「跣親腳傷左又要消防同救護去救，根本就浪費資源」。

另有網民分享其救護員朋友的經歷，指有一次救護團隊還未吃飯的情況下，接獲市民聲稱「流血不止」的案件，到現場發現原來只是「唧暗瘡」致流血不止，該朋友只好保持專業態度向市民解釋此情況可以自行處理；然而，「嗰位人士堅持要送去醫院......仲要求搵擔架床抬佢落樓」。

延伸閱讀：

新確診者近半未能即日送院 醫管局拆解延誤原因+醫護難處【整看更多】

每朝索取《晴報》：精明生活．健康家庭．開心娛樂

撰文：林幸琦