沈桃
沈桃

《姨媽到》

發佈時間: 2020/08/10

《姨媽到》

同事問我有無睇《姨媽到》?我心諗係唔係啲咩女性影片,但原來係陳志雲YouTube「志雲頻道stephenchannel」新推出的處境劇《姨媽到》,搵埋歌手石詠莉、演員莫竣名及劉亭君主演,頭兩集仲請咗陶傑客串。

夜麻麻撳入條片,嘩!原來係講鬼,好驚喎,仲有好少做戲嘅陶傑演捉鬼師傅,真係又驚又喜!

故事講述柔哥(石詠莉飾)、Mr Bean(莫竣名飾)及Ayumi(劉亭君飾)開咗一間coffee shop,Mr Bean上網買咗個1931年製造嘅二手咖啡壺,喺英國運嚟之後就發生一連串靈異事件,於是搵陶傑嚟舖頭做番場英式驅鬼。

正當陶傑想同隻鬼溝通時,柔哥將個壺掉咗出街,女鬼「Margaret Elizabeth Dunn」陳志雲就出現了,個名咁長,佢叫人簡化啲叫佢做大姨媽。原來佢喺89年由香港移民去英國後,被人用咖啡壺鑿死,自此冤魂不息,依附喺咖啡壺入面。

製作班底專業,演員演得好,主題曲《同行》悅耳。

一直都有睇陳志雲嘅舞台劇,雖然佢唔係專業演員,但係佢嘅演技非常到位,今次做女鬼,真係唔睇唔得!仲要share畀啲friend一齊睇㖭!

究竟3個老闆點幫大姨媽尋求真相,破解30年嘅冤情呢?密切留意今日中午上載嘅第3集!

(本欄逢周一刊登)

撰文: 沈桃 好飲好食好奇之穿花蝴蝶
欄名: 中環蝴蝶