【醫護辛酸】工作量大反被指「唔捱得」 救護員列8點反擊籲先自行反思 「你屋企人喊係邊個抹眼淚安慰？」

本港新冠肺炎疫情持續，救護員、醫生、護士等人員為抗疫可謂盡心盡力。一位自稱為救護員的男網民，昨日（9日）向Facebook群組「公務員secrets」投稿，表示在新冠肺炎疫情下，不少救護員抱怨工作量繁多，卻被人指摘為「唔捱得」，事主遂列出8點「反擊」，更稱：「教吓你哋班人點做人！」

子女倚外傭照顧父母 長者家中被忽視

事主表示，有子女雖然有錢請外傭照顧年長父母，卻不知道兩老身患疾病；或是召救護車後，回答不出父母「有咩長期病、要食咩藥」。他更提出，大部分外傭其實甚少理會僱主，「喺屋企玩電話多過理個老人家」，最終令長者忘記食藥致出現血壓高或低的情況，或是太餓導致血糖低，

「（外傭）姐姐無心機餵飯，『老友記』食得好慢，食咗少少（外傭）就拿拿聲收起啲嘢洗完碗繼續玩電話，可憐嘅『老友記』就餓到血糖低，有時瀨咗屎（外傭）都唔同佢哋換片。」

獨居長者生病跌倒無人關懷

事主又指，獨居老人的情況更慘，形容他們家裡「污糟邋遢又多雜物」，電器故障無人幫忙修理；長者在家中跌倒亦無人理會，他們更經常進食「隔咗幾日嘅冷飯冷餸」，終導致痾嘔肚痛，事主不禁痛批：

「你班不孝子女簡直枉為人，真係久病床前無孝子。不過你放心，你老咗一定會有報應，到時救護員嚟到就傷心到喊啦，我哋會畀紙巾你。」

「飛車黨」不負責任摧毀無數家庭

此外，事主又批評超速駕駛者「趕時間嘅就早啲出門口」，天雨路滑仍「飛車」根本罔顧道路安全。更令事主氣怒的是，涉事者撞到人、落車罵人時「就鬼打咁精神」，警方到場則聲稱頸痛、腰痛「喺到詐死」，令事主倍感不滿，

「幾多致命交通意外就係因為啲『飛車』呀！撞死咗幾多小朋友阿爸阿媽？撞死咗幾多家庭支柱？你養埋人哋屋企呀？你點賠返條命畀人？」

家庭暴力事件每天上演

事主表示，基本上每天都有家庭暴力事件發生。對於那些虐打妻子、女友和子女的施暴者，事主認為「講都解決唔到嘅事」，「郁手郁腳」也於事無補，

「人哋都有阿爸阿媽生㗎！知唔知點解人類識講嘢呀？溝通呀！有咩唔啱咪傾到啱囉，傾唔啱咪落街飲罐啤酒汽水冷靜吓（一罐好喇醉咗又要車你去醫院）。」

車輛停泊消防通道阻礙救護車

事主又指，救護車接報到場後，不時發現有車輛停泊在消防通道「擋住條路」，辦事爭分奪秒的救護員，被迫把車停泊到「無雷公咁遠」，事主不禁揶揄：

「你覺得我泊喺人哋屋企樓下落車上樓快，定行一大段路先上樓快？」

懶理救護員爭分奪秒居民極速閂𨋢門

事主續指，救護員救人後等升降機落樓，曾多次遇到有大廈住戶開門後「嗱嗱聲閂𨋢門」，未有讓救護員先行落樓，

「你哋落樓緊要啲，定我哋做嘢緊要啲？」

吸煙人士報稱「呼吸困難」仍「煙不離手」

事主透露，不時接獲吸煙人士報稱「氣促呼吸困難」，卻在救護員到場時「仲食緊煙」，甚至在「聞氧氣」期間欲點煙，

「知唔知氧氣係易燃㗎！會爆炸㗎！你條命賤唔代表我哋都係呀！爆炸搞到火燭，影響到隔離左右樓上樓下，你負唔負責得起？」

工作範圍以外救護員照樣做到足

事主坦言，時常提醒老人家入院前帶齊銀包、電話、身份證、鎖匙；協助「跟車」的病人家屬拿「大包細包」；為穿着裙子或低胸上衣的女士蓋上毯子以防「走光」；為跌至「內臟腦漿爆晒出嚟」的跳樓死者蓋白床單，「唔使畀啲街坊指指點點，畀死者最後嘅一點尊重」。以上統統都是救護員工作範圍之外的提點，或對死傷者的尊重。

事主在文末表示，還有「大量不計其數細微細眼嘅事都唔係人工包嘅」，惟並非每一位市民也了然於心，事主不禁感嘆：

「我唔會話所有救護員都對工作充滿熱誠，但係至少繼續堅持緊嘅都仲有想幫人嘅心。」

延伸閱讀：

【醫護辛酸】再有救護員斥市民濫用服務 反被質疑捱不到應主動辭職 「麻煩畀啲尊重」【查看詳情】

【醫護辛酸】救護員直踩15小時無休息 怒轟市民濫用資源 「救護車唔係免費的士」【查看詳情】

文章獲Facebook專頁「公務員secrets」授權刊登。

每朝索取《晴報》：精明生活．健康家庭．開心娛樂

撰文：蘇麗儀