孫慧雪喺剛播完嘅《殺手》飾演殺手經理人陳查理（鄭子誠飾演）老婆Yumi，性格天真單純，唔少觀眾都話好鍾意呢個角色，又大讚佢年屆38歲，樣貌、身材都keep得好好，唔似生咗個小朋友。
(《殺手》電視截圖)
日前，孫慧雪著住白色小背心，喺社交平台開直播，大方分享3招豐胸方法：「只要未去到更年期，無論咩年紀都可以豐胸。」
(孫慧雪instagram圖片)
孫慧雪大爆自己讀書時只得A cup，後來佢向同學請教，先知要從飲食方面著手，終成功變成C cup。佢建議大家食多啲有助豐胸嘅食物：「有豐富蛋白質嘅牛奶、豆漿、木瓜、杏仁、魚湯，有好多骨膠原嘅豬腳、雞腳。魚皮、魚肚、三文魚、雞蛋、松子、粟米、紅棗、蠔、蜂王漿、龍眼肉、核桃、甜酒都得。」除此之外，佢話用按摩膏由外向內幫胸部打圈按摩，可以幫助豐胸，令胸部更堅挺，防止鬆弛、保持彈性。最後佢支持大家做運動，訓練膊頭附近嘅肌肉，支撐胸部，望落胸形會靚好多。
(孫慧雪facebook截圖)
唔只上身豐滿，孫慧雪身形仲好纖瘦，原來佢喺一個月內減咗足足10磅。佢接受本報訪問話唔使做運動，唔使節食，食到好飽都可以喺30日內減到咁多，秘訣係全靠低醣飲食法，戒食澱粉質，以蛋白質食物同蔬菜為主。因為碳水化合物會導致身體儲額外水份，令身體水腫，減醣後身體唔再水腫，身形睇落就會差好遠。孫慧雪話自己一日兩餐為求飽肚，冇乜計算份量，午餐會食水餃、雞蛋；晚餐食海鮮、牛扒、雞柳；水果就會揀低糖嘅士多啤梨同藍莓，避食高糖嘅芒果、菠蘿，或者含澱粉質嘅蘋果。
(孫慧雪instagram圖片)
(孫慧雪instagram圖片)
(孫慧雪instagram圖片)
孫慧雪喺懷孕期間曾重達160磅，生完之後最瘦得117磅，但因為佢太鍾意食嘢，於是又重番，去到125磅。用咗低醣飲食法，佢依家只得115磅：「以前我都有食澱粉質，只要戒油戒鹽，加埋運動，就好輕易瘦10幾磅。依家再做呢個方法就唔得，生完BB真係難減咗，因為年齡大，新陳代謝慢咗，所以先要完全戒澱粉質。我係每晚要食兩碗飯嘅人，可能我本身食咁多嘢，一戒咗就即刻減到10磅。」
不過佢強調唔係鼓勵人唔做運動，只係佢想先減磅數，之後再會練線條：「我之前都會跑步，但依家要返工、照顧小朋友，所以冇時間做運動。等疫情好啲，我會搵番教練幫我練線條。我唔係鼓吹大家唔做運動，運動係好見效，只係依家從飲食著手，減咗磅數先。」
(孫慧雪instagram圖片)
撰文：張芷晴
責任編輯：楊安莉