今年45歲的吳彥祖（Daniel）一向是不少人心目中的男神，不過自從他返美國之後，生活簡約，不時在社交平台拍片時，都被批評形象跳Watt，不過Daniel一於少理，他日前接受好友陳哲廬（Jerald）YouTube節目《本週Jer住你》訪問，他透露因兩個原因而選擇留美發展，又指在美演戲是希望為下一代「舖路」。
相關新聞：【形象崩壞】吳彥祖拍片現雙下巴兼滿臉油光 網民嘲笑昔日男神如油膩大叔
（YouTube截圖）
（YouTube截圖）
Daniel在訪問中提到當初來港發展，第一份工作便是擔任模特兒，當時他拍了一個平面廣告，導演楊凡在地鐵站看到他的廣告便找人聯絡他，Daniel說：「我去咗佢公司傾了個幾鐘，隔咗兩、三個鐘後佢打電給畀我，話想我做佢男主角，但我推咗佢。因為我完全唔識廣東話，又無演過戲，我知道拍戲唔係咁簡單，導演個作品就係佢嘅baby，我當時心諗『你搵個咩都唔識嘅𡃁仔去做你男主角？你癲㗎？』我話唔好喇，我唔想有呢個責任，所以推咗。不過佢又打咗幾次畀我，後尾我話好呀，你唔怪我搞差你套戲，我就會試吓。」之後，Daniel於98年便拍了他首套電影《美少年の戀》，從始便踏上他的演戲路。
（YouTube截圖）
(微博圖片)
談到近年返美發展演藝工作，Daniel透露因14年母親患上癌症，他決定留美照顧媽咪，但不幸地吳媽媽與癌魔搏鬥八個星期後離世，Daniel表示：「媽咪走咗，但我都想繼續照顧嗲哋，同埋喺呢邊已經買咗屋。」而另一個促成他留美發展的原因，是Daniel和Lisa S現年7歲的女兒吳斐然（Raven），他表示：「喺香港陪個女去公園，會有好多人攞手機影我；我試過有次孭住囡囡去超市，有個女人拎手機好近咁影我個女，我好嬲咁捉住佢隻手鬧佢，我係演員你可以影我，但唔好影我個女；仲有就係喺香港讀書好大壓力，我唔想個女太辛苦，之後就決定去美國。」
（IG圖片）
（IG圖片）
身為美籍華裔影星的Daniel，在荷里活甚為吃香，近年參演了不少電影《人造天劫》、《氣象戰》及《魔獸爭霸：戰雄崛起》，亦以製作人身份主演AMC劇集《荒原》，但他在訪問中卻謙稱在美國的影視界只是飾演一些小角色，又表示：「好多人問我點解去美國會Struggle（掙扎），你有香港同大陸市場，任你揀，可以搵好多錢呀，但我依家所做嘅，係為下一代而做。」他解釋自己在美國長大時，幾乎沒有看過有唐人出現在大銀幕上，但近30年，大家都陸續看到。」Daniel認為自己有這種使命感為下一代籌謀，讓美國、歐洲及亞洲的小朋友，知道自己可以成為明星和演員，Daniel又表示：「依家見到道門開咗少少，希望可以推開佢再穿過，係好難，但要有正面態度。我覺得美國影視界已經愈嚟愈開放，唔係好似以前咁『反亞洲人』。」
《美少年の戀》（網上圖片）
美劇《荒原》（網上圖片）
提到過往在香港拍戲的點滴，Daniel自言性格內斂比較少說話，但在參演《門徒》時卻劉德華談了很多話題，在對方身上獲益良多，至於跟劉青雲和唐文龍亦師亦友，兩人都教導他很多東西。至於拍戲時可有試過被導演罵？Daniel直言沒有，但就試過講對白時不合導演要求，他說：「拍《新古惑仔之少年激鬥篇》時，有句對白要我講『咁我閃啦』，我個閃字講得唔好，劉偉強導演就話不如改講『撇』，但我完全唔明咩叫撇，又係講得唔好，之後佢就話拍下一組，可能佢心諗點解啲中文咁差。」
（網上截圖）
撰文：倪小珊