陳柏宇同老婆符曉薇（Leanne）2018年誕下女兒Abigail，兩公婆出名好鍾意小朋友，並一直希望為囡囡添多名細佬妹。日前Leanne拍片自爆原來喺5月時發現懷有第二胎，但後來不幸證實為宮外孕，更導致要緊急手術切除左邊輸卵管。
（符曉薇IG）
Leanne指知道自己懷孕之後首兩個星期開始下體出血、腹部覺得「掹掹緊」咁痛，不過第一次去睇醫生嘅時候，醫生以為佢BB着床位置正確，更指好少機會宮外孕，令Leanne都放心咗唔少。不過之後一個星期Leanne都Keep住出血，去到再次覆診嗰日更痛到以為自己盲腸炎，想暈低同標冷汗，寢食不安。去到醫院一照嘅時候發現大量出血，證實咗真係係宮外孕，更加因為咁而爆咗一邊輸卵管，要緊急入醫院做手術。
（Youtube截圖）
Leanne話醫生畀佢可以選擇切除或者修復輸卵管，但修復後同一個地方好容易有宮外孕，而Leanne自己都上網見到有其他媽媽都試過因為咁再次宮外孕，所以佢選擇咗切除輸卵管。Leanne今次做手術要全身麻醉，佢形容畀人拍醒第一下係呼吸唔到，之後仲嘔吐大作，非常辛苦。
（Youtube截圖）
Leanne指肚要吹脹再開咗三個窿做微創手術，起碼一個月先完全還原。（符曉薇IG）
Leanne表示如果唔係爆咗輸卵管，宮外孕係可以食藥畀個胎自然痿縮再排出。佢指宮外孕其中一個明顯症狀係腹會好痛，雖然佢佗第一胎時都有類似經痛嘅腹痛，但遠不及呢次咁強烈。
（符曉薇IG）
Leanne出院時媽咪都有去照顧佢，雖然媽咪唔識煮嘢食，就上網睇宮外孕手術後要食啲咩，將佢照顧得好好。Leanne就好似坐月咁，沖薑水涼、飲湯、食補品，依家身體已經好得七七八八。
囡囡都好鍾意BB。（符曉薇IG）
今次嘅不幸除咗傷身之外，仲非常傷心。發生呢件事之後Leanne心情好低落，既失望又失落，因為當佢宣布喜訊時家人朋友都好開心，Leanne失望令到其他人失望；失落係真係好想有BB，都好想有多個小朋友陪阿Abigail，想兩個有個伴一齊玩。Leanne更一度幻想胎兒仍安全喺肚裏面，只係爆咗個輸卵管。雖然醫生表示3個月後就可以再嘗試做人，不過頭一個月Leanne仲係好大陰影，幸得一位好朋友幫佢走出困境。
（符曉薇IG）
Leanne呢位好朋友結咗婚一段時間都好想要小朋友，一直都用嘗試用自然方法懷孕。不過就不幸兩次宮外孕，更切咗一邊輸卵管，醫生唔建議佢再自然懷孕。呢位朋友就去做人工受孕，亦都試過失敗，而人工受孕時打嘅排卵針令荷爾蒙改變，媽媽自身都會非常唔舒服，但佢亦一直冇負面情緒，而呢位朋友冇耐之前都成功生B。Leanne就形容呢位朋友係佢偶像，因為佢嘅心態咁強咁正面，令Leanne覺得自己都唔可以咁容易被打敗。
（符曉薇IG）
Leanne接受《晴報》訪問時，態度都好正面樂觀：「希望可以拍一條片同大家講咩係宮外孕，今日有個朋友同我講佢太太啱啱做完呢個手術，大家會同大家講加油，大家會明白，好多fans畀好多溫暖我，一路Jason（老公）都好關心我，反而唔係話好傷痛，可能有傷痛……但佢傷痛我感受多啲，所以佢係非常幫到我走出呢個痛苦之中，等過咗疫情之後會繼續努力做人。」
（符曉薇IG）
Leanne話Jason繼續搞笑，令到好緊張嘅氣氛變得搞笑，因為準備入手術室要禁飲食，護士幫Leanne吊鹽水，Jason就揸住杯水同Leanne包鹽水乾杯，令Leanne笑番。喺醫院嗰幾日，老公都日日去搵佢、晚晚都同佢FaceTime，有時陪伴已經係最好嘅關懷！祝福Leanne！
（符曉薇IG）
撰文：黃蘊姿