【反黑路人甲】張振朗再遭賴慰玲逼婚封搞笑CP 微博曬全裸劇照竟被刪除？

新劇《反黑路人甲》由王浩信、張振朗、湯怡、高海寧同馮盈盈主演，如今劇集只係播咗兩集已經好評如潮，唔少觀眾大讚臥底高彬（張振朗飾演）同大家姐蔣千霞（賴慰玲飾演）呢對係最搞笑嘅CP。

劇情講述高彬被警方派去黑社會做臥底，成為蔣氏旗下嘅社團小頭目，同蔣家大小姐蔣千霞嘅得力助手。後來蔣家要爭坐館，蔣千霞想逼高彬做老公，畀佢繼承龍頭之位。為求達到目的，佢想高彬食藥，「霸王硬上弓」咁同高彬發生性關係。慘被剝光豬嘅高彬驚到走咗，裸跑咗一小段路，結果被誤會係變態色魔被捕。

{{hket:inline-image name="21.jpg"}}{{/hket:inline-image}}

(《反黑路人甲》電視截圖)

去到第2集，蔣千霞又再逼婚，將高彬推倒床上。蔣千霞表示只係畀高彬一小時行房，不時命令佢瞓低，但都被高彬以唔同藉口拒絕。此時，蔣家三小姐蔣千惠（林宣妤飾演）入房，想夾硬拉走高彬，同家姐蔣千霞搶高彬。

{{hket:inline-image name="18.jpg"}}{{/hket:inline-image}}

(《反黑路人甲》電視截圖)

{{hket:inline-image name="20.jpg"}}{{/hket:inline-image}}

(《反黑路人甲》電視截圖)

{{hket:inline-image name="19.jpg"}}{{/hket:inline-image}}

(《反黑路人甲》電視截圖)

今次張振朗有床戲，又有裸跑戲，大膽為劇犧牲色相，事後佢喺社交平台上載咗一張佢瞓喺地下嘅全裸劇照留為紀念。雖然佢嘅重要部位已經打咗格仔，又用令牌遮住，不過始終被微博刪咗張相。唔少網民感到可惜，指張振朗甘願為藝術犧牲，好專業，仲大讚佢幾有喜劇細胞，同賴慰玲非常合拍，床戲好好睇，封埋佢哋做「搞笑CP」。

▼本身張相係咁

{{hket:inline-image name="11.jpg"}}{{/hket:inline-image}}

(張振朗微博圖片)

{{hket:inline-image name="17.jpg"}}{{/hket:inline-image}}

(張振朗微博截圖)

其實張振朗唔係第一次為藝術犧牲色相，佢喺《全職沒女》曾經有幕裸泳畫面。劇情講述佢唔著衫游水，嚇到陳松伶大叫，以為有色魔，將佢打暈。當時未埋位嘅張振朗好驚青，著咗好多條肉色褲打底。雖然佢話覺得好似被好多對眼非禮咁，不過最後仍願意豁出去完成嗰幕。

{{hket:inline-image name="14.jpg"}}{{/hket:inline-image}}

(《全職沒女》電視截圖)

{{hket:inline-image name="15.jpg"}}{{/hket:inline-image}}

(《全職沒女》電視截圖)

有晒經驗，唔怪得呢次張振朗再拍裸露鏡面時一啲都唔驚，反而拍檔賴慰玲喺鏡頭後一見到佢條疑似底褲露咗出嚟就大叫：「喂呀，好核突呀！」

{{hket:inline-image name="12.jpg"}}{{/hket:inline-image}}

(Big Big channel截圖)

{{hket:inline-image name="13.jpg"}}{{/hket:inline-image}}

(Big Big channel截圖)

入行8年，張振朗拍過唔少劇，飾演嘅角色類型都好唔同。例如張振朗曾喺《師父·明白了》飾演書生白鶴懿，形象斯文溫柔，同樂瞳嘅苦戀感動唔少觀眾；喺《陪著你走》飾演明星金秀玄，再同樂瞳飾演情侶，既青澀又純真嘅愛情得到唔少網民好評。17年，張振朗喺《踩過界》飾演殘障人士偵探Gogo，為人有情有義，同王浩信嘅兄弟情深受觀眾歡迎。近年，張振朗於《包青天再起風雲》飾演武功高強嘅展昭、《機場特警》中飾演性格自負嘅警察，以及喺《堅離地愛堅離地》嘅扮毒男丁信希，均入型入格。

撰文：張芷晴
責任編輯：楊安莉