新冠肺炎疫情尚未受控，人人自危，琴晚江嘉敏喺社交平台自爆早前拍完出浴戲後，大腿長滿紅疹，驚到佢立即停止所有工作安排，去進行新冠病毒肺炎檢測，之後一直留家等化驗結果。好彩江嘉敏嘅病毒檢測結果呈陰性，佢馬上上載咗張戴眼鏡嘅相，指自己「開心到素顏落街食咗個飯」又自嘲：「素顏去嚇人」，但粉絲就大讚：「素顏同唔素顏都咁靚」、「未免太靚女了吧」
(江嘉敏instagram圖片)
{{hket:inline-image name="16.jpg"}}{{/hket:inline-image}}
(江嘉敏instagram截圖)
入行6年來，江嘉敏人紅是非多，同過唔少合作嘅男拍檔傳出緋聞，如何廣沛、王浩信、余德丞等。佢曾經因為呢啲緋聞搞到情緒崩潰，有輕生念頭，幸好佢已經走出陰霾，依家佢同有米男友Anthony拍咗拖兩年，感情愈來愈好。
Anthony現年32歲，大江嘉敏7年，據知佢畢業於美國加州柏克萊大學，喺著名電競公司擔任產品部總監，住千幾萬港元豪宅。江嘉敏話自己係喺朋友聚會識到Anthony，當時朋友打緊麻將，唔識打嘅佢喺隔籬係咁問問題，Anthony都會耐心解釋，佢笑言初時Anthony唔認得佢係明星。本來江嘉敏想低調處理感情事，唔想影響家人，後來佢愈來愈高調，不時將男友掛在口邊。Anthony亦將IG帳戶轉為公開，成日上載二人著情侶衫嘅合照曬恩愛。
(Anthony instagram圖片)
江嘉敏曾接受傳媒訪問，笑言被男友3點吸引住。第一，佢讚Anthony孝順，咩都同家人傾。原來Anthony單身時曾被唔少女仔追求，不過佢對江嘉敏情有獨鍾，問過家人意見，加埋自己深思熟慮過，終決定揀佢做女友。第二，江嘉敏話Anthony好理性，會教佢點處理問題，令一向脾氣大嘅佢唔再易發嬲。佢又指Anthony會追睇佢嘅劇集，畀唔少意見，好似老師咁，令佢進步。
(Anthony instagram圖片)
第三，江嘉敏指Anthony對佢好似太后咁寵愛，食飯時間、地點都就晒佢。有時佢拍劇捱夜，Anthony會揸車接佢收工、買湯包畀佢飲，生暗瘡都會買藥膏畀佢。早前江嘉敏廣州拍節目病咗，Anthony扮酒店服務生呃佢開門，送藥同寫卡畀佢。Anthony仲會自動報行蹤，影埋相，令佢好有安全感。
(Anthony instagram圖片)
江嘉敏對Anthony有讚無彈，但佢就自嘲係粗心大意嘅女友。佢話Anthony冇嫌棄自己，仲同佢講：「等我好好照顧你！」真係隔住熒幕都感受到濃濃愛意，希望佢哋早日拉埋天窗！
(Anthony instagram圖片)
撰文：張芷晴
責任編輯：楊安莉