TVB節目《我要做業主》繼馮盈盈、肥媽同翟威廉呢幾位星級嘉賓先後分享上車嘅心得，最新一集就由陸浩明首次公開「落錯車」嘅經歷。
陸浩明初出茅廬時曾經喺荃灣租屋，惟後來業主月租加價500蚊，佢認為太貴，覺得與其畀錢幫業主供樓，不如買樓畀自己，於是唔再租屋。
(《我要做業主》電視截圖）
2010年，陸浩明以30歲之齡用咗275萬港幣購入深井500幾呎嘅私樓單位，完成首次置業：「嗰時戶口有50、60萬，就諗不如買個單位。其實真係好平，同業主講價劈咗佢5萬蚊，275萬成交，加埋雜項30幾萬啫。」住咗兩年時間，某日陸浩明見到陳豪，令佢忽發其想：「我泊車見到陳豪，我心諗佢住啲單位好靚，諗諗吓我覺得我要離開深井，轉去將軍澳嗰邊發展會好啲。」
由於把握到入市時機，陸浩明嘅物業升咗3成，後來佢轉工，想搬近啲TVB，結果賣咗層樓，佢笑言：「帳面賺咗6位蚊字，60幾、70萬港幣，人工10年都冇咁多，所以賣咗先。」本來陸浩明諗過再喺將軍澳區買樓，但佢遲遲唔肯落手：「嗰時啱啱轉去TVB，對前景茫然不知。我個性格係好踏實，有安全感會好啲，又要照顧屋企人，覺得戶口有錢會穩陣啲。」結果佢一直喺將軍澳區租住兩房單位。
(《我要做業主》電視截圖）
等到工作穩定，陸浩明打算趁低市再買樓，可惜樓價不斷上升，佢一直都等不到低水位再次入市，佢大嘆後悔：「喺高位放，想喺低位買，以為自己係高手，個個都要做樓神，係冇可能！」主持胡諾言問：「係咪你嗰時對肥媽唔好，佢冇醒幾招畀你？」陸浩明話：「佢係樓神嚟，啱啱識肥媽唔敢問太多，只係會傾邊度街市買餸平。」
(《我要做業主》電視截圖）
{{hket:inline-image name="2A5C83CA-1B98-4DF3-8DD2-F6696FE7ABA5.jpeg"}}{{/hket:inline-image}}
(《我要做業主》電視截圖）
最後陸浩明轉向投資海外物業，選擇喺大阪再次置業：「香港嘅樓愈睇愈貴，愈買唔到。」陸浩明改變想法，佢話希望喺香港買到間兩房細單位，用來放租，自己就繼續租啲3、4房單位，仲提醒年青人：「千祈唔好諗住樓市會冧，如果有目標想買，就努力做嘢同儲錢。」
(《我要做業主》電視截圖）
(《我要做業主》電視截圖）
(《我要做業主》電視截圖）
撰文：張芷晴
責任編輯：楊安莉