張振朗扮學生妹驚畀楊偲泳打

張振朗昨日出席宣傳《反黑路人甲》，與賴慰玲重演電影《天若有情》駕駛電單車的經典一幕，張振朗穿上婚紗反串成「厚切版」吳倩蓮，相當搞笑。他笑言有幾次扮女人經驗，但穿婚紗則是第一次。問他為何不「僭建」上圍？他笑說︰「呢排練得背肌太厚，再塞嘢我驚會爆，同埋勁過高海寧。」

張振朗稍後在劇中會扮成學生妹出場︰「我會婀娜多姿過湯怡，我畀定心理準備大家，我驚佢哋會打爆電視，因為係我從影以嚟最恐怖嘅一幕。」他笑言曾給女友楊偲泳看過造型︰「女友有睇過相，好彩無見真人，我驚佢忍唔住摏我，其實張相無乜人睇完會唔想摏我，哈哈！」

攝影︰林良明