【連YouTuber都做埋】張致恒拍片教人點幫BB吸鼻水 網民留言支持：依家一臉慈父樣

35歲嘅張致恒Steven今年年中榮升兩子之父，佢經常喺社交天台上載同大仔張天寶、細仔張生牧，同老婆雯雯嘅合照，記錄生活日常，一家四口好幸福。琴晚（17日），佢開設個人YouTube頻道，上載短片教人湊仔，佢話：「第一次拍片希望大家唔好介意，我會不停改善品質，今次想同大家分享下嬰兒用品嘅！」佢講到明齋噏當秘笈，歡迎大家睇完畀啲意見。

{{hket:inline-image name="12.jpg"}}{{/hket:inline-image}}

(張致恒YouTube影片截圖)

短片中，張致恒先解釋自己點解突然間做YouTuber：「最近喺IG嗰度，好多朋友就話既然我咁鍾意煮嘢食，佢哋又鍾意睇湊仔生活，不如拍啲嘢擺出嚟同大家分享吓，所以我選擇咗拍啲生活上嘅嘢。」之後佢用細仔做示範，教大家點用吸鼻器幫小朋友清走鼻水。細仔似乎唔太鍾意被吸鼻水，五官扭曲，張致恒好有耐性咁安撫佢嘅心情，睇落非常熟手。

唔少網民留言形容張致恒係慈父，又鼓勵佢拍多啲唔同類型嘅短片：「支持你改過自新，依家一臉慈父樣」、「我想睇你煮嘢嘅影片，做爸爸穩重咗」、「拍吓生活日常都得」，另外仲有唔少網民為佢加油，佢回覆：「多謝你支持」另外亦有網民叫身形脹爆嘅張致恒減吓肥。

{{hket:inline-image name="11.jpg"}}{{/hket:inline-image}}

(張致恒YouTube影片截圖)

張致恒去年宣布奉子成婚後捲入桃色風波，被揭發一腳踏幾船，仲被成班受害女仔鬧爆，後來張致恒喺社交平台道歉，最終形象掃地，演藝工作大受影響。早前張致恒公開表示為咗兩餐乜都肯制，做過廚房炒散，依家做緊兼職經紀，博命工作，養妻活兒。工餘時間，佢嘅生活離唔開湊仔、煮飯同做家務，努力從賤男洗底變做顧家男。

{{hket:inline-image name="15.jpg"}}{{/hket:inline-image}}

(張致恒instagram截圖)

{{hket:inline-image name="14.jpg"}}{{/hket:inline-image}}

(張致恒instagram截圖)

{{hket:inline-image name="16.jpg"}}{{/hket:inline-image}}

(張致恒instagram直播截圖)

被張致恒嘅負面新聞影響，老婆雯雯慘被朋友疏遠，佢對張致恒仍不離不棄，不時讚對方盡責照顧家庭。

(相關新聞：張致恒細仔滿月雯雯長文撐老公 朋友嫌「影衰」疏遠:世界好現實)

{{hket:inline-image name="13.jpg"}}{{/hket:inline-image}}

(雯雯instagram截圖)

{{hket:inline-image name="14.jpg"}}{{/hket:inline-image}}

(雯雯instagram截圖)

然而唔少網民對雯雯窮追猛打，近日雯雯喺IG玩「你問我答」時，有網民重提舊事:「你點忍受佢當初有正印，仲同佢一齊？」佢冇正面回答。有網民指雯雯好忍得，問佢點樣包容老公，雯雯表示：「要睇你本身有幾愛呢個男人，同埋同得呢個男人生小朋友，就有責任畀一個完整家庭小朋友。」有網民指張致恒唔定性，唔明點解雯雯要再生仔，問佢會唔會覺得對個仔唔公平，雯雯回覆：「你又知我老公依家冇改變、好唔定性？我諗我個仔會答你，佢依家好幸福，亦好愛佢爸爸。」雯雯回答時亦不忘為老公護航，有個咁好嘅老婆，張致恒真係要珍惜！

{{hket:inline-image name="17.jpg"}}{{/hket:inline-image}}

(雯雯instagram動態截圖)

撰文：張芷晴
責任編輯：楊安莉