驚囝囝「反瞓」會窒息 古巨基變身「夜更保安」護愛兒

古巨基與太太Lorraine育有八個月大的兒子Kuson，日前基仔接受電台訪問，自爆現時每晚都通宵守護囝囝睡覺，以免BB因反身睡覺而導致意外。另外，昨日48歲生日的基仔，獲Kuson叫了第一聲「爸爸」，以及「合唱」兒歌作生日禮物，令基仔感動得又喊又笑。

古巨基與Lorraine自兒子出世後，親力親為貼身照顧，但因疫情肆虐，基仔曾透露一家三口已近半年沒有出門。日前，基仔接受商台節目《雲妮鍾情》訪問時，表示近來都日上三竿才起床，他解釋說︰「因為我半夜會睇住BB瞓覺，佢最近比較反瞓，會瞓瞓下趴咗喺度，但佢又未識得轉番身，又唔會喊，搞到我好擔心。」

因此，基仔夫婦分日夜更輪流照顧囝囝，負責通宵更的基仔每晚守候在BB房間外，若發現囝囝的睡姿有任何不妥，他便會衝入房︰「因為我驚我喺房入面郁，會嘈醒佢，所以惟有喺房門外睇閉路電視，如果見到佢趴喺度瞓，就衝入去將佢擺好（轉身），呢樣就係我呢個爸爸每日做嘅嘢。」

父子「合唱」兒歌賀壽

另外，昨日牛一的基仔，分享跟囝囝「合唱」賀壽的片段。片中Kuson清楚說出「爸爸」，令基仔感動留言︰「多謝你給我的生日禮物，讓我笑不攏嘴也滲出眼水的一句︰爸爸。」他希望好好陪伴兒子成長，教囝囝做個心地善良的人：「我會很樂意陪你做任何事，任何時候只要你需要我。我一定會身體健康。」

撰文︰倪小珊

編輯︰李潔盈

美術︰梁政敏