童星出身嘅黃美棋已經31歲，隨住年齡增長，佢嘅身材愈來愈好, 唔講唔知，原來佢份人好勤力㗎！
(黃美棋instagram圖片)
琴日係黃美棋嘅生日，佢喺社交平台發文，宣布自己成功解鎖成就：「正式同大家宣布！我成為咗一個香水調配師啦﹗呢個係今年生日送畀自己嘅其中一份禮物。」原來黃美棋一直都好鍾意儲香水，為咗將興趣變成職業，佢早前報讀咗香港一間香水學校，考取香水鑑賞及調香員證書，現時終得到香水調配師專業資格。好學嘅佢仲話會讀埋專業深造課程，希望可以創立個人香水品牌，叫大家有咩關於香水嘅問題可以同佢一齊研究。
(黃美棋instagram圖片)
除咗將會成為香水調配師之外，黃美棋仲係一名老闆。去年佢同拍檔合資7位數，喺將軍澳經營台式食店，當時佢曾經接受傳媒訪問，表示短期目標係想開分店。雖然今年受到新冠肺炎疫情影響，佢坦言餐廳入座率減半，收入亦比以前跌咗一半，但佢指外賣生意有所提升。佢又話自己現時偶爾都會到餐廳幫手，希望跟員工一同齊心合力度過難關。
(黃美棋instagram圖片)
入行26年，黃美棋曾經拍過教育電視，亦喺唔少經典TVB劇集同電影中演出過，代表角色有《刑事偵緝檔案》系列簡棠棠、《行運一條龍》小芬女等。當時黃美棋臉圓圓、眼大大，精靈可愛嘅外表好受觀眾歡迎。長大後，黃美棋一度退隱，佢曾經接受TVB娛樂新聞台訪問，指媽媽當時唔贊成佢向娛樂圈發展，認為演戲只可以當作業餘活動，佢亦有意在向商界方面發展，所以選擇慢慢淡出娛樂圈，遠赴美國修讀柏克萊加州大學經濟系，專注學業。
(《刑事偵緝檔案》電視截圖)
{{hket:inline-image name="19.jpg"}}{{/hket:inline-image}}
(《行運一條龍》電影截圖)
大學畢業後，黃美棋回流香港做文職，但佢覺得對辦公室工作乏味，於是決定返娛樂圈發展。12年，佢加盟香港電視，1年內已經拍過6套劇，包括《我阿媽係黑玫瑰》、《導火新聞線》等，喺《大眾情性》更當上第二女主角。港視最終未獲發牌，佢喺17年重返TVB，大多獲派擔任節目主持，例如《香港美食一條街》、《#後生仔傾吓偈》等，現時拍緊新劇《陀槍師姐2020》。
(黃美棋instagram圖片)
黃美棋唔只做節目同拍劇，又要睇住餐廳生意，仲要抽時間修讀香水課程、考潛水牌，積極增值自己，生活非常忙碌。身為廿四孝女朋友嘅佢更加成日陪男朋友鍾健威健身、唱歌，不時拍片曬恩愛。一個女仔能夠分身做咁多嘢，佢簡直係女強人。
(黃美棋instagram圖片)
(黃美棋instagram圖片)
撰文：張芷晴
責任編輯：楊安莉