【再次公審】大肚吳若希鬧老公「新寵」垃圾 網民睇唔過眼出錢出力贊助離婚

28歲嘅吳若希同老公Alex何兆鴻婚後育有囡囡Giselle，依家佢正佗緊第二胎。早前吳若希喺社交平台埋怨老公影寫真時表現得唔夠甜蜜，琴晚七夕佢又撰文公審老公，自爆一度萌生離婚念頭。

(相關新聞：吳若希曬孕照抱怨老公似道具 網民撐Alex:唔夠愛你又生多個?)

事緣吳若希喺社交平台上載咗張同老公背對背嘅相，相中佢老公拎住手提電話，而佢就用手指扮手槍，吳若希撰文大爆老公冷落佢，令佢想離婚：「七夕夜，最真實構圖。何生跟他的電話恩愛了一整晚，我跟我肚子搏鬥了一整晚。然後我默默地在手機search『離婚方法』。」幸好吳若希得個諗字：「看完發現過程要那麼繁複，那還是算了~」最後佢仲話：「叫你手機幫你生兒子。」

{{hket:inline-image name="11.png"}}{{/hket:inline-image}}

(吳若希instagram圖片)

▼吳若希趁老公打機影咗張相

{{hket:inline-image name="12.png"}}{{/hket:inline-image}}

(吳若希instagram動態截圖)

原來Alex玩緊依家好hit嘅手機遊戲「灌籃高手」，吳若希留言指嗰個手機遊戲係「垃圾game」，又繼續呻老公為咗玩打機忽略自己，連囡囡出口叫佢擺低電話，佢都唔擺。有網民就留言為Alex講說話，認為Alex可能喺手機搞緊單好大嘅生意，想賺多啲畀一家四口，吳若希話佢都係咁樣安慰自己，仲笑言希望有朝一日老公為遊戲課金嘅錢可以連本帶利落番佢袋。另外有網民提議吳若希掉咗佢老公部手機、喺老公手機搜尋離婚方法等，不過吳若希話冇咩用。有人好搞笑咁叫吳若希扮手機，佢似乎覺得幾可行，仲問網民知唔知喺淘寶網有冇扮iphone嘅服裝賣。

{{hket:inline-image name="16.png"}}{{/hket:inline-image}}

(吳若希instagram截圖)

{{hket:inline-image name="15.png"}}{{/hket:inline-image}}

(吳若希instagram截圖)

另一邊廂，有部分網民留言表示睇唔過眼吳若希成日踩老公，話睇唔出佢同老公有幾愛對方，覺得佢當時因為有咗BB先結婚，點知吳若希好大方咁話：「係，我都覺得我哋之間無愛。」有網民就認為吳若希日日諗離婚，婚姻應該唔會長遠，吳若希就表示：「好彩我淨係隔日諗嘅啫。」另外有網民人身攻擊，爆粗鬧吳若希講嘢唔得體、任性、港女，覺得佢要檢討自己點解比唔上個手機遊戲，吳若希向網民道歉，自嘲垃圾都不如，會認真檢討自己，表現得好高EQ。

{{hket:inline-image name="14.png"}}{{/hket:inline-image}}

(吳若希instagram截圖)

仲有網民提出可以幫吳若希搞離婚，吳若希留言回答：「無錢請律師，可唔可以贊助我？」該網民回覆可以，叫吳若希私訊傾。然而，最後網民話等咗成晚，吳若希都冇私下搵佢，睇嚟佢今次同之前一樣，只係講吓笑，同老公耍吓花槍而已，大家唔使咁緊張。

{{hket:inline-image name="13.png"}}{{/hket:inline-image}}

(吳若希instagram截圖)

撰文：張芷晴
責任編輯：黃蘊姿