「大劉」劉鑾雄同昔日「紅顏知己」呂麗君（現名：呂姵霖）喺2014年分手，當時劉鑾雄指自己曾向呂麗君贈予超過20億港幣嘅禮物同物業，佢相信二人即使分開，呂麗君亦可過優質嘅生活。如今二人嘅囡囡劉秀盈長大咗唔少，17歲嘅佢長得亭亭玉立，似足媽媽。
(東星圖片)
劉秀盈好鍾意唱歌，經常喺個人YouTube頻道「Zoe Lau」同IG帳戶「zoelaumusic」分享自彈自唱片段，聲線溫柔，唔少網民都話聽出耳油。
(劉秀盈YouTube頻道截圖)
為人相當親民嘅劉秀盈仲好鍾意同網民互動，尋晚佢喺網上搞咗個「你問我答」嘅環節。
劉秀盈話自己透過其他人口中發現有關佢嘅報導，好開心大家讚佢係才華洋溢嘅芭蕾舞員同結他手，但佢澄清絕對冇入娛樂圈嘅想法。唔少網民問佢點解唔參與漢基國際學校為期一年嘅寄宿學習項目「杭州漢基」，去大陸交流，佢就話自己唔想離開香港，更重要係佢想繼續陪伴屋企人。當被問到學校生活，佢話個個同學都好友善，未試過被人欺凌。
劉秀盈又指，人生多年來都冇遇過咩特別挫折，佢話總之自己會一直努力奮鬥，直到取得成功，或者對結果感到滿意為止。後來有網民分享心事，佢即時安慰同鼓勵對方，對陌生人都好Warm，完全冇富家小姐嘅架子！
(APP截圖)
不過有網民問起佢媽媽呂麗君嘅保養方法時，佢即刻落閘拒答，話唔想講其他人嘅私事，警覺性相當高。
(APP截圖)
另外熱愛跳芭蕾舞嘅劉秀盈近日不時喺社交平台分享在家練舞嘅影片，意外將市值超過4億，位於山頂嘅獨立屋豪宅內貌曝光。片中見到豪宅玄關非常寬敞，樓底高到打羽毛球都冇問題。大屋大門用上深色木材，採用歐式古典風格，感覺奢華。
(劉秀盈instagram圖片)
(劉秀盈instagram圖片)
另外，劉秀盈練習彈奏烏克麗麗嘅影片見到, 豪宅大廳中央放咗兩張白色梳化，放置7支或以上嘅結他；仲有間鏡房放置三角鋼琴、整套爵士鼓，樂器齊全到好似一間琴行咁呀。
(劉秀盈instagram圖片)
(劉秀盈instagram圖片)
(劉秀盈instagram圖片)
(劉秀盈instagram圖片)
不過另一張彈結他嘅相入面見到秀盈嘅閨房就冇大廳咁誇張，秀盈喺床邊掛咗塊貼滿合照嘅松木板，擺咗幾隻公仔，貴為千金小姐嘅佢房間陳設同一般少女無異，唔會非常奢華。
(劉秀盈instagram圖片)
(劉秀盈instagram圖片)
劉秀盈家底好，才藝多，難怪唔少網民都話好羨慕佢啦！
撰文：張芷晴
責任編輯：黃蘊姿