新冠肺炎全球大爆發，香港主要外傭供應地菲律賓及印尼相繼封城，令外傭有供不應求嘅情況出現，甚至有完約外傭與僱主續約時坐地起價，嗌價逾兩倍至月薪萬元，唔少僱主都覺得非常無奈。
（94年亞姐參舉截圖）
94年亞姐季軍曹央雲日前就喺社交平台上載相關新聞，有感而發大呻「受氣」：「就算滿足對方要求畀高薪5位數都無用，只係嚟享用僱主間屋度假，調理身體休息養生，倘僱主不服從工主指示或叫幫手家務便有排受佢脾氣。可能因為我係交稅的香港人，所以香港政府一直在僱傭方面得不到任何保障；而不必交稅的工主姐姐反而背景強大，除擁如黑社會的工會、勞工處外還有政府撐腰，在全球疫症嚴峻失業下，最惡最有市場係班香港工主姐姐！」
（曹央雲Facebook）
曹央雲續指姐姐們疫症下可以無限期留港；菲律賓領事館又提供生活津貼資助金，引發姐姐「炒僱主」開天殺價，好多姐姐寧願當放大假慢慢揀工。佢指自己日日interview姐姐反而遭姐姐「審問」，仲話求啲姐姐都唔肯做，其中一個原因係嫌佢家有兩個女兒，而曹央雲兩個女兒已經係大個到可以自理。
（曹央雲Facebook）
後來有人留言話可以代為介紹，不過曹央雲就話佢已經放棄請姐姐，寧願自己處理家務更安心，免得要日日睇面色。唔少網民都留言話見到都戥佢慘，好多人都話自己有差唔多嘅遭遇，好姐姐難求咁話；不過都有網民撐姐姐亦有權利揀自己嘅工作環境，雙方覺得合適就簽約。
（94年亞姐參舉截圖）
現年46歲嘅曹央雲自入行後是非多多，參選亞姐時同同屆冠軍李妮不和，李妮更暗寸佢係「霎眼嬌」，曹央雲反擊大爆李妮「臭狐好勁」，事件當時成為大家茶餘飯後嘅話題。
（網上圖片）
曹央雲喺亞視星運平平，但感情生活精彩，佢承認身邊有多位追求者，當年先後同麥翠嫻老公龔汝華、葉玉卿老公胡兆明傳緋聞。2001年曹央雲被爆同時任嘉域集團主席何永安撻著，其後進駐山頂大宅，更為對方誕下2名女兒，曹更以「何太」自居。
（曹央雲Facebook）
2009年4月，曹央雲喺山頂豪宅報警稱被人襲擊，受傷送院。未幾就同何永安分手，獨力湊大2名女兒。
（曹央雲Facebook）
有指曹央雲投資有道，手持7億物業，一身名牌手袋名牌，生活富泰，但佢母親同與繼父就住公屋，佢同母異父嘅弱聽胞弟2003年更企圖跳樓，之後又不斷傳出曹央雲同媽媽為錢爭拗。曹母曾接受傳媒訪問指控女兒7年來不相往還，自己生活拮据，望女兒每月畀2萬或者一筆過畀500萬照顧，曹央雲發聲明指自己一直盡女兒責任，實在問心無愧，仲話唔想兩個女兒重蹈佢覆轍畀人擺佈。
撰文：黃蘊姿