【居住問題】情侶全職進修中 港女呻男友唔肯簽紙結婚抽居屋 「我計過畢業後好快爆入息上限」

本港樓價高企，令不少市民無法買樓「上車」，部分年輕人更難以成家立室。一名正與男友全職進修醫護課程的港女在網上發帖，大呻男友不肯與她簽紙結婚抽居屋，認為對方未有為彼此將來作打算，更疑問道：「其實佢係咪唔想同我結婚先一直拖？」

「我一直都好想結婚，而男朋友都話想同我結婚，但係結婚當然煩買樓。」該名港女前日（8月30日）在網上討論區「連登」發帖，指自己與男友拍拖3年，兩人均是「大學乞食科畢業之後發現撈唔掂」於是辭職，轉為全職修讀醫護課程。鑑於樓價高企，為了兩人的將來，她於是詢問男友不如先簽紙結婚抽居屋，「到時抽中咗，畢咗業先擺酒或者唔擺都冇所謂，簡單同親戚公布吓」；然而，男友卻表明想畢業後才結婚，

「之但係我計過如果我哋順利畢業做到醫護嘅話，好快就會爆居者（居屋）入息上限，到時就要焗住買私樓，所以我成日想趁着讀書依幾年簽紙結婚抽居者，博下抽唔抽得中，但係佢就死都話要畢咗業先。」

住公屋與妹同房怕被同學知道，中大生製書櫃照背景營造「中產感」，詳情即睇：【下一頁】

她指出，男友解釋希望畢業後收入有保障才結婚；但當她問對方「萬一」其中一人以單人名義抽中居屋「咁結唔結婚」， 男友回答指「抽中咗就結」，令她不禁疑惑：「咁即係都唔一定要等到畢業啦，咁點解唔結咗婚先抽增加機會，其實佢係咪唔想同我結婚先一直拖？」

網民苦勸：有信心有能力以後大把世界

此事引來網民熱議，不少人讚賞事主願意與男友「一齊捱」，但認為事主雖然想得遠，卻不夠宏觀及全面，「為咗層樓，要趕住去結婚，好似唔係好啱邏輯」、「如果你男朋友話以後都唔買樓，結咗婚都係租樓，你會唔會分手？」、「畀首期，裝修，乜稅物稅，之後仲要供，冇收入抽中都冇用」、「又可能你男友可能過唔到自己個關，冇樓冇錢」。

同時，亦有網民勸她：「居屋唔係抽到就免費畀你，係要供，只係平私樓少少。為咗居屋而結真係諗清楚，家庭機會高過單人，都唔係必中，可能結咗抽十年都唔中。其實有信心有能力，後生嘅，以後大把世界。」

港女指儲蓄可應付首期：屋企人會幫手供住先

對此，事主回應替指自己已投身社會幾年，「有啲儲蓄所以首期唔係問題」；至於供樓方面，

「我哋屋企人都同意抽中嘅話，喺我哋讀書嘅時候幫我哋供住先，之後再還返畀佢哋。」

她又解釋之所以想買樓，是因為男友父母一直租樓，「所以等佢哋退休後我男朋友嘅負擔會好沉重」；同時，因為男友是獨生子，「我哋都覺得買樓對將來比較好，租樓唔可以租成世」。最後她表示，自己並非要找個「有樓事業有成嘅男人」，而是想與男友一起規劃將來，「咁結婚之後係咪唔使搵地方住先，抽中咗我都會同佢一齊供，話晒居者（居屋）負擔細啲，我只係覺得如果已經認定咗對方，點解唔早啲結婚博吓。」

中二生見同學住大屋感自卑，港媽心疼兒子無面擬儲錢搬離公屋，詳情即睇：【下一頁】

每朝索取《晴報》：精明生活．健康家庭．開心娛樂

責任編輯︰李凱晴