【紐約慘案】89歲婆婆當街被兩男襲擊點火 吳彥祖懸紅12萬緝兇被讚真男神

吳彥祖從出道至今，憑住有型外表，多年來一直被網民封為男神。除咗靚仔樣，佢嘅內在美一樣突出。尋晚佢喺社交平台撰文，宣布懸紅$15,000美元 (約11.6萬港元)，希望將美國一單案件嘅兇徒緝拿歸案。

{{hket:inline-image name="20.jpg"}}{{/hket:inline-image}}

(吳彥祖instagram圖片)

{{hket:inline-image name="14.jpg"}}{{/hket:inline-image}}

(吳彥祖instagram截圖)

案件發生喺美國紐約市布魯克林區，早前有名89歲嘅華裔婆婆喺大街上行走，期間有兩名途經嘅蒙臉男人行近婆婆，突然摑咗佢一巴，仲喺佢裇衫上點火。婆婆馬上拉起頭髮，以免火勢蔓延，再將背部貼住牆，成功滅火，最後婆婆件衫燒咗個大窿。據報導所述，婆婆唔識講英文，只識講廣東話，佢表示自己之前從未見過嗰兩名男人，對方當時咩都冇講，亦冇喺佢身上竊取任何財物，襲擊完佢就逃之夭夭。警方公開事發畫面，希望能搵出兇徒，案件目前仍在追查中。

事件引嚟網民廣泛關注，該區非牟利社區組織同喺當地生活嘅MC Jin歐陽靖, 就共同出資15,000美元（約11.6萬港元）成立獎勵基金緝兇。尋日吳彥祖宣布出資15,000美元，令到懸賞金額增至30,000美元（約23萬港元）。事後MC Jin轉發吳彥祖嘅帖文，多謝佢嘅慷慨捐助，並感激佢為佢哋嘅社區發聲。

{{hket:inline-image name="13.jpg"}}{{/hket:inline-image}}

(歐陽靖instagram圖片)

吳彥祖接受當地傳媒訪問時，指自己睇到一名老人家因為種族原因，遭到襲擊並被縱火嘅消息時，深感震驚。佢認為所有人都應該反對呢種可惡嘅行為，並將嫌疑人繩之以法，所以決定懸紅等大家幫手緝兇。社區服務董事會主席Don Lee就感謝吳彥祖支持同慷慨捐助，見到付出嘅努力得到支持，佢感到非常鼓舞。佢希望增加獎勵可以鼓勵更多人提供有關嫌疑人嘅資訊，又指會繼續同執法部門合作調查案件。

▼吳彥祖曾撰文發表睇完件案嘅感受

{{hket:inline-image name="18.jpg"}}{{/hket:inline-image}}

(吳彥祖instagram截圖)

唔少藝人都對吳彥祖嘅行為讚好，另外好多網民大讚吳彥祖係真男神：「謝謝你為華人發聲」、「人帥心正」、「為你覺得驕傲」、「你係個了不起嘅人，感謝你利用個人影響力為華裔社區發聲」等，吳彥祖回覆指自己只想捉到嗰兩個衰人。

{{hket:inline-image name="17.jpg"}}{{/hket:inline-image}}

(吳彥祖instagram截圖)

撰文：張芷晴
責任編輯：楊安莉