【俾八萬賺千萬？】網上營銷課程有平有貴 小心選擇增值唔怕俾人呃

疫情下多咗人上網，網上營銷課程亦愈來愈多，呢類課程五花八門，學費由免費到幾萬蚊都有，而近排最多人談論就肯定係Brian Cha（車志健）莫屬，佢喺YouTube鋪天蓋地賣佢嘅網上營銷課程廣告，點知有報咗課程嘅討論區網友分享經歷和感受，令更多人開始關注呢類課程嘅可信度。

其實報讀課程係你情我願，真金白銀畀錢去讀，做決定嗰個始終係自己。只不過有網友覺得課程內容純粹只係教企業家心態、心理激勵、使用Click Funnel（一種網上營銷工具）嘅一個課程，達唔到「俾八萬賺千萬」嘅效果，所以就覺得貨不對辦。

{{hket:inline-image name="0902WLfeaturepage553.jpg"}}{{/hket:inline-image}}

▲Brian Cha Motivation廣告。（YouTube截圖）

計我話「俾八萬賺千萬」呢句宣傳口號其實無誇大。因為就係參加呢個課程嘅學員，每個人俾8萬幫個導師創造咗千萬收入。因為1個學生收8萬蚊，招到125個就1000萬，所以「俾八萬賺千萬」無錯吖，不過係「學生俾，導師賺」之嘛。

不過咁，報讀8萬蚊課程就賺到年薪千萬，如果真係咁簡單，相信個個都發達唔使打工啦。講到尾，進修提升知識固然係好事，但大嗱嗱8萬蚊絕對唔係小數目，報讀之前一定要考慮得好清楚，因為而家數碼/網上營銷課程真係五花八門，由各種機構頒授嘅證書同文憑多不勝數，大家應該點樣選擇好呢？以下分享幾個貼士：

1）兩類課程要識揀

市場上關於數碼營銷嘅課程大致分為兩類。第一種係基本概念入門課程，呢種課程一般以介紹概念為主，會簡單教你數碼營銷基本原則、媒體及平台操作。第二種係專門範疇課程，例如社媒推廣、搜尋引擎優化（SEO）、電子商務、多媒體製作、客戶關係管理等，特色係每個課程時間唔長，但深入去學一種知識/技能。

2）認可院校有信心

進修同購物消費一樣，幫襯有信譽嘅店舖會放心啲，例如各大學嘅校外進修課程都係唔錯嘅選擇，皆因師資同認受性都有保證，又或者商界認可進修機構，例如香港管理專業協會開辦嘅「數碼市場推廣專業行政文憑課程」都幾多打工仔讀，大概4個月完成，學費約1萬港元，仲可申請CEF。近年仲有網上學習平台採用逐個課程單元收費模式，想讀邊個就買邊個，例如台灣嘅HaHow（好學校）。

{{hket:inline-image name="0902WLfeaturepage552.jpg"}}{{/hket:inline-image}}

▲各大學嘅校外進修課程都係唔錯嘅選擇，皆因師資同認受性都有保證。

3）認清進修的價值

進修係對未來嘅投資，首先要認清投資是否值得。究竟我們可唔可以從課程學到嘢？回唔回到本呢？如果唔可以「回本」的話，咁上呢個課程又有乜價值呢？例如好多人花幾十萬讀個MBA、EMBA，就係認為之後升職跳槽加薪同建立優質人脈網絡，會令自己賺得更多。

4）善用免費學習資源

如果想用最短時間，最低成本去了解數碼營銷技巧，可以透過免費資源同網上平台了解唔同嘅銷售技巧。例如想學Google Analytics可先參加「Google Analytics (分析) 學習中心」免費課程，先打好入門基礎，想學Facebook營銷亦可以去Facebook Blueprint官方電子學習中心，有網上培訓課程及免費學習資料。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/