疫情漸見緩和，堂食亦將延至晚上10時，雖只限2人同桌，要一家人食飯可能仍要留家，但不要以為除了「自煮」就只能外賣捱飯盒，其實外賣都可以有不少驚喜選擇。本報網羅6個令人「意想不到」的外賣套餐，由威靈頓牛柳、雞煲、燒肉、再到酒店典雅High Tea，應有盡有，日日留家抗疫都不怕悶了。
1. 「難搞」威靈頓牛柳20分鐘出爐
網店PanMen Kitchen早前推出半製成品食材包，威靈頓牛柳、法式脆皮乳豬仔、慢煮48小時美國特級牛小排等高級餐廳美食，全部食材pack好一包包，選購後連食譜送到家樓下，最快用幾分鐘已可製成。記者實測，發現放入焗爐20分鐘即「零失敗」完成出名「難搞」的威靈頓牛柳，頗有成功感。
2. 疫市新店賣雞煲 2人烚烚下$328起
要食雞煲、火鍋，當然是與一大群親朋好友「烚下烚下」最開心，限聚令下難外出，在家同樣可歎美食。粉嶺新開雞Pot專做外賣，套餐最平$328起，可選麻辣雞煲或市面較少見的藥饍醉雞煲，隨餐還有肥牛片、響鈴等食材附送，買滿$600即免運費（港島加$50），每日下午4時前落order，更可即日送貨，最適合愛玩即興的港人。負責人Jasper透露，未來計劃增設單點服務，隨時「叫一隻雞都送」！
3. 屋企鐵板燒歎靚食材 無爐加$1租埋畀你
除了打邊爐，燒肉亦是港人至愛。本身做開食材買賣的永軒優質食材專門店，疫下轉型賣燒肉套餐，4至6人餐$538，可食和牛西冷、珍寶帶子、大虎蝦等，加$1更可連鐵板石燒兩用電烤爐一齊租用，翌日再上門回收，非常方便。負責人黎先生更指，推出以來反應熱烈，連爐具都供不應求，所以有興趣租爐，就記得預早訂啊！
4. 自助餐送上門？ 每位$113食盡12款美食
Mr.Steak推出65折食2人外賣自助餐，只需$226即可在超過40款美食中選12款，除海鮮凍盤的蟹腳、海蝦、青口外，亦可選美國安格斯燒牛肉、壽喜燒、DIY心太軟等，人均消費只是$113，CP值超高，美食仲多到擺滿屋企張枱。
5. 4層架High Tea 屋企豪歎why not?
甜點一向廣受歡迎的帝苑餅店，第一次推出下午茶外賣，架上包括5款甜品及4款鹹點，包括鮮青檸檬忌廉芝士煙三文魚撻、鴨肝醬無花果奶油麵包；蜜瓜造型的蜜瓜芝士餅、熱情果椰子撻、日本香桃奶凍、草莓西瓜玫瑰餅等；並附送英國有機香草茶包，在家打住卡食，簡直是貴婦級享受。兩位用收費$568，訂購可享85折優惠，折後只需$482.8。
6. 「榴槤控」必試 直送貓山王甜品set
唯港薈向來深受歡迎的「飄香榴槤下午茶」亦推出外賣套餐，利用馬來西亞直送貓山王榴槤果肉入饌，創作出多款精緻榴槤甜點，包括D24榴槤椰子糯米糍、迷你芝士蛋糕、抹茶荔枝榴槤卷、貓山王榴槤布甸、榴槤斑蘭千層蛋糕等，並加送榴槤單球雪糕禮券，兩位用僅收費$438，匿喺屋企同另一個榴槤控一齊享用，臭味相投，不用怕因氣味被人投以「歧視」目光啦。
撰文：石嘉盈
責任編輯：梁偉澄