羅天池曾經效力TVB 14年，拍過多套劇集，不過大多數只係飾演配角，冇被器重，5年前佢決定離巢。由於佢精通舞獅、搏擊、空手道、柔道、飛刀、泰拳同MMA，亦曾喺巴西柔術比賽上奪冠，成功憑呢個優勢轉型做動作導演、武術指導，收入增加咗唔少。近日，佢喺抖音上載咗條短片，分享入行多年佢經歷過咩鮮為人知嘅日子。
(羅天池instagram圖片)
(羅天池instagram圖片)
(羅天池instagram圖片)
羅天池年少唔懂事、太曳，曾先後被兩次踢出校，後來佢隨家人移民定居於加拿大溫哥華。機緣巧合下，佢參加咗舞台劇演出，從中得到虛榮感，令佢從此愛上演戲。於是佢決定返香港，投考咗兩次藝員訓練班後成功加入TVB。
佢話成日被人問起，以前TVB人工能唔能夠維持生活，佢坦言唔得：「出糧非常少，都係出底薪。冇晒錢，我揸電單車都唔知點出門，我唔係講笑，真係1蚊都冇。」當時羅天池趕住返錄影廠開工，揸車到隧道，發現冇錢畀隧道費。佢唔理警報，直接衝過收費站。返到公司，羅天池向當時嘅藝人好友張雪芹借100蚊，張雪芹再借多100蚊畀佢傍身。最後羅天池拍完幾場戲，馬上返收費站還錢。
(抖音影片截圖)
▼張雪芹
(TVB電視截圖)
不過嗰段時間未係最艱苦，羅天池曾經開過酒吧同製作公司，結果同樣失敗收場，令佢一度陷入低潮。佢話當時情況甚至差到被人追債：「會好頭痕點樣撲水，亦都有同朋友決裂，好多嘢發生。」
(抖音影片截圖)
不過入行多年都總有開心事，羅天池憶述當自己獲邀喺《愛回家》做重要角色，開心到不得了。
(朱滙林；羅天池微博圖片)
有次TVB助理總經理（戲劇製作）曾勵珍留意到佢喺某劇做嘅村民角色，當面讚佢演技好，令佢好驚喜：「珍姐居然留意到我！」之後羅天池更加因為曾勵珍一句，瞬間被點醒，努力做好演員：「我即刻多謝佢：『我會畀心機演好，一定唔會令你失望！』珍姐講：『唔係你令我失望，你做得唔好，係你令自己失望。』啱喎，原來勁人講嘢係咁。」
(抖音影片截圖)
如今42歲嘅羅天池專注喺幕後方面發展，同過唔少電視劇同電影合作，例如近年佢曾為黃子華主演嘅賀歲喜劇《乜代宗師》擔任動作指導。
(羅天池instagram圖片)
佢強調自己仍然係一位演員，會以偶像甄子丹作為目標，想拍一套懸疑警匪動作片。現時佢長期喺大陸工作，佢指自己唔會只係留喺一個地方，劇組去邊，佢就會去邊。片段最後，佢仲同大家分享人生大道理，叫各位要記住即使成日被人鬧、被安排做幾多嘢，都唔好有不滿或者投訴。
撰文：張芷晴
責任編輯：楊安莉