【聲明】港生活網站並無進行電話推廣活動

《反黑路人甲》扮大家姐 賴慰玲:霸氣係做自己

發佈時間: 2020/09/04

劇集《反黑路人甲》情節愈來愈緊湊,主角「細蔣生」王浩信周旋不同女伴的曖昧劇情夠吸引,飾演黑幫頭目的「大小姐」賴慰玲與臥底張振朗的愛火花也有睇頭。賴慰玲的霸氣演繹受觀眾喜愛,令她開心不已,又笑言今次是本色演出。

賴慰玲在劇中飾演的大小姐「蔣千霞」,不但擔起頭家,又幫助廢柴哥哥王浩信鞏固在「四聯幫」勢力,大家姐的強悍氣場,令觀眾眼前一亮。賴慰玲接受《晴報》訪問時笑說:「其實霸氣只係做番自己,反而扮柔情就真係花咗唔少氣力,好彩張振朗畀咗強大肩膊我依偎,等我可以小鳥依人。」

賴慰玲與「臥底高彬」張振朗的感情戲,展現黑幫大家姐的溫柔一面。她笑說:「每次同張振朗拍對手戲之前,會一齊傾應該點拍。到劇集播出,一班演員經常喺群組討論劇情,睇下將來拍劇有咩改善嘅地方。」

她直認拍《反黑路人甲》相當辛苦,因黑幫戲份通常在晚上拍攝,捱夜情況比一般劇集更多︰「拍攝期間,成班演員都話『唔瞓覺啦,見你哋仲多過見屋企人』。睇到觀眾反應比預期中好,覺得辛苦都值得。」

獲黃秋生力讚無壓力

對於前輩黃秋生曾公開讚賴慰玲,指她的演技有望達到鄭裕玲(Do姐)級數,賴慰玲謙稱「未夠班」,又表示沒有壓力:「一直以嚟,我唔會特別睇評論去演出,不過今次大家都幾鍾意喎,其實唔係我一個人嘅努力,始終要成班演員互相磨合,先有咁嘅成果。我真係好鍾意呢個劇本,因為好少有一部劇集,係每位演員都有發揮機會。」

採訪 ︰ Pauline

攝影︰林良明

編輯:李潔盈

美術:梁政敏

《反黑路人甲》扮大家姐 賴慰玲:霸氣係做自己

賴慰玲(左)在劇中經常黑面,以保護妹妹傅嘉莉(右)及林宣妤。

《反黑路人甲》扮大家姐 賴慰玲:霸氣係做自己

賴慰玲與張振朗的感情發展,令觀眾非常肉緊。(資料圖片)