【聲明】港生活網站並無進行電話推廣活動

Oscar愛種花養鯊魚 江伊晴讚老公無不良嗜好

發佈時間: 2020/09/04

江伊晴(Elanne)老公蕭唯展(Oscar)興趣多多,愛養魚又愛盆栽,Elanne不忘提醒老公唔好有「輘輷」(音:景轟)。她接受《晴報》電話訪問時打趣謂︰「養魚咪幾好,有益身心又唔使花費咁多錢。」

江伊晴早前在社交網爆老公愛「拈花惹草」,原來是指Oscar迷上種盆栽,甚至因此當她透明,所以Elanne才會忍不住在網上大呻。Oscar亦養了五條屬於稀有品種的魚,為了這幾條「寶貝」,他們更特別訂製一個巨型魚缸。Elanne向本報透露︰「嗰啲係我老公嘅寶貝,我只係下人,屋企嘅地位順序係貓、魚、盆栽,我就排第四,所以叫『阿四』。」

不過Elanne亦愛屋及烏,對於飼養的魚瞭如指掌,更「魚」數家珍般逐條介紹︰「佢養咗五條魚,一條係『過背紅龍』,養咗四年左右,係佢最鍾意嘅,佢覺得條魚游來游去顏色好紅好靚,好有霸氣;另一條係『白化鯊魚』,係一條白色鯊魚,身形有啲怪怪哋,但我老公就係鍾意佢夠奇特。第三條係我最鍾意嘅,條魚成身都係黑白波點,叫『黑白蒲魚』,個魚身好似小鳳姐(徐小鳳)嘅波點裙;另外兩條『鵝頭斑馬』,身上有啲橫紋,有啲似斑馬。」

提早過阿叔生活

談到Oscar熱愛種植盆栽,亦鍾情飼養奇形怪魚,Elanne揚言好過有其他不良嗜好。她表示︰「剪下草、淋下花都ok,但出面嘅『草』同『花』就唔好掂喇,養魚唔使太多錢,每個月都只係幾百蚊!有啲人鍾意車、手錶或者打機,我老公啲嗜好雖然好阿叔,但都好健康。」

撰文︰倪小珊

編輯︰陳禮恒

美術︰梁政敏

Oscar愛種花養鯊魚 江伊晴讚老公無不良嗜好

白化鯊魚(上)及似波點裙的黑白蒲魚,令人大開眼界。(受訪者提供)

Oscar愛種花養鯊魚 江伊晴讚老公無不良嗜好

Elanne與老公的珍藏「過背紅龍」合照。(受訪者提供)