【50歲中佬愛自拍】唐文龍被指外表突然憔悴蒼老 唔理形象拍片揭北上拍劇辛酸

唐文龍北上拍劇已有3個月時間，最近佢喺直播平台抖音頻頻更新近況。其中有段佢喺車上自拍，露出燦爛笑容，點知網民留言指佢個樣好殘：「唔好搞到自己咁憔悴好冇」、「你蒼老了」，又有人問佢點解唔打理凌亂嘅頭髮，又唔修剪過粗嘅眉毛：「冇錢飛髮？」、「頭髮打完颱風」、「眉毛是黏的嗎？」等，甚至有人覺得佢同愛因斯坦撞樣。

{{hket:inline-image name="13.jpg"}}{{/hket:inline-image}}

(唐文龍抖音影片截圖)

唐文龍大方回應，佢指自己趕去橫店拍劇，連續幾日冇得瞓，而且坐車坐咗6個鐘頭，所以望上去好憔悴。已經年過50嘅佢仲表示唔介意大家評論自己個樣，堅持唔用濾鏡，畀真面目大家睇：「我平常就是這樣，不好意思，老也要偶爾搞搞氣氛呢。」另外，唐文龍解釋啱啱喺車上瞓醒就拍片，所以冇搞過個頭，佢自嘲好似經歷完8號颱風、龍捲風咁：「頭髮亂了，笨笨的，算啦有時隨意一下，大家都開心。」最後佢指自己最近要拍古裝片《春家小姐是訟師》，角色好有氣勢，所以唔修眉。

{{hket:inline-image name="14.jpg"}}{{/hket:inline-image}}

(唐文龍抖音影片截圖)

唔止工作奔波勞碌，唐文龍指橫店平均溫度37度，有時氣溫會高達40度以上，加上佢需要戴上古裝頭套、厚衫就更熱，令佢好暈：「熱死人了！快要中暑。」除頭套都係件好麻煩嘅事，佢話頭套用膠水黏住皮膚，膠水要用酒精先卸得清:「你想想對皮膚怎麼樣...」

{{hket:inline-image name="12.jpg"}}{{/hket:inline-image}}

(唐文龍抖音影片截圖)

有幾次等到收工，唐文龍開心到唔理形象，喺古裝街上一邊狂奔，一邊拍片，佢坦言希望盡快跑返酒店沖涼。

{{hket:inline-image name="19.jpg"}}{{/hket:inline-image}}

(唐文龍抖音影片截圖)

{{hket:inline-image name="17.jpg"}}{{/hket:inline-image}}

(唐文龍抖音影片截圖)

{{hket:inline-image name="16.jpg"}}{{/hket:inline-image}}

(唐文龍抖音影片截圖)

唐文龍非常貼心，幾乎每個網民嘅留言都會回覆，有時佢仲會開解佢哋，好似社工咁。例如有粉絲指唐文龍睇落好後生，但自己好老，唐文龍鼓勵佢應該好好過每一日:「誰不老呢？不過看看怎麼經營好自己。」又有粉絲表示如果有佢一半酬勞就好，唐文龍勸勉對方：「這個世界，你看我好，我看你好，各有自己的人生，都有背後的故事、過程。別人的田特別肥，先做好自己。」好窩心。

{{hket:inline-image name="15.jpg"}}{{/hket:inline-image}}

(唐文龍抖音影片截圖)

入行25年嘅唐文龍由樂壇轉戰電視圈，拍咗唔少代表作，包括《十月初五的月光》、《溏心風暴3》等。演過咁多角色，唐文龍最難忘原來係喺《情事緝私檔案》一個單元故事裡面嘅富二代谷立行。劇中有幕，佢打開爸爸臨終前寫畀佢嘅信，佢話當時一開拍，情緒就湧出嚟，令佢好深刻，唔知大家記唔記得呢幕？

{{hket:inline-image name="20.jpg"}}{{/hket:inline-image}}

(《情事緝私檔案》電視截圖)

直到下個月，唐文龍先會拍完古裝劇，呢段時間大家可以繼續留意佢嘅抖音帳戶，了解佢開工情況。

撰文：張芷晴
責任編輯：楊安莉