狂野水姐蔣家旻 成功洗底

熱播劇《反黑路人甲》中，蔣家旻演繹性感嫵媚的水姐（姚清水），是社團中一位話事人，出入都有大班兄弟保護。水姐能夠利用美色去做事，當然會有不少裙下之臣，但她偏偏在無意間愛上敵人蔣世龍（王浩信飾）。今晚的劇情，講述她以為高彬是蔣世龍的最愛，跟她爭男人，在氣憤下率眾找高彬晦氣，誓要燒死對方。

今次蔣家旻的角色令觀眾眼前一亮，徹底洗走以往小妹妹的感覺，就算劇中跟徐榮再次合作，大家也找不到《愛‧回家》中馬強和馬子妮兩父女的感覺。家旻說︰「今次個劇唔係嗰回事，同徐榮開工對得最多，但完全唔會尷尬覺得係父女，反而同羅天宇就真係覺得佢係我阿哥。」

外貌不老的局限

以往蔣家旻三個字往往跟《愛‧回家》的馬子妮畫上等號，對她而言是福亦是禍，她笑言︰「我無主動去孭住呢個包袱，係外界畀我的，有好有唔好，好似永遠長唔大咁，不過，也代表角色深入民心，咁多年都仲記得。由我20歲出頭到依家30歲，有時我去買化粧品或者整車，都有人稱呼我做馬小姐。」她認為外貌不老當然開心，但作為演員，先入為主的感覺卻變成一種工作上的局限，失去挑戰的機會。她說︰「可能個角色要做別人女朋友，但男演員比較成熟，就總係會變兄妹咁。」

對今次飾演水姐這個既狂野又性感的角色，家旻直言有一定的期望，她說︰「我今次真係好想洗底，呢個劇本同角色我都好鍾意，同以前形象好唔同，我唔期望會大紅大紫，只希望觀眾鍾意個劇之餘，對我有不一樣的睇法。觀眾睇到蔣家旻終於大個女，可以駕馭到唔同角色，繼續畀更多機會我去嘗試。」

家旻是獨生女，她感激父母放手讓她去追夢，家人沒有要求太多，只是催促她置業求個安穩，她直言現時照顧到自己，希望能夠再進步，讓家人有個安樂窩。

入行13年，家旻視演員為終身職業，她期待慢慢由配角走上女主角之路，她說︰「好想試唔同角色，戲份愈來愈重，我想有女主角嘅一日，不一定要即刻做女一，慢慢由配角做起，（等好耐？）我覺得如果太早畀我演，我又未必做得來。依家有信心，得到角色就盡量去做好佢。我上年有入圍《最佳女配角》，但今年怕好『忟水』，我都好想入圍《飛躍進步女藝員》，算係對自己一個交代。」

多年來，圍繞家旻的新聞多是霧水緋聞，最令人印象深刻的一次是她私下接拍電影，被罰離開《愛‧回家》。她說︰「當時我無經理人合約，諗住有機會試電影，咪去試囉，但最終角色同馬子妮有好大衝突，加上種種原因，我就被寫走咗。幸好多謝珍姐（曾勵珍）同監製，半年後畀我回歸，拍到去結局。」

對愛情欠缺信心

她直言被踢走的空窗期有得亦有失，得到的是金像獎最佳新人提名，失去的是半年不能夠拍《愛‧回家》，她說︰「以前任性想點就點，依家30歲可能考慮嘅就會多好多，我未必有勇氣試。」對於花邊新聞往往與人氣掛鈎，家旻說︰「我嘅緋聞唔會影響形象，所以無乜點理會，過往我都無好肉酸嘅新聞，第三者、搶人男友或者鬥爭是非亦唔會有我，因為我好清楚自己做緊甚麼。拍拖會有，但可能我對愛情無信心，我唔想咁高調、公開，萬一分手又覺得我係玩玩下。我好想有一日好似譚凱琪咁，大家都知道我有個穩定對象，直到結婚生小朋友。」

髮型︰ Kenny Chan @ Hair

服裝︰ Amelie Street

場地︰ OysterMine

撰文︰楊安莉

攝影︰楊嘉傑

編輯︰黃寶恩

美術︰梁政敏