唔介意女友情史 馬貫東認戀朱敏瀚舊愛

在劇集《那些我愛過的人》演患亞氏保加症醫生而人氣急升的馬貫東，日前被揭與富家女蘇詠童（Christy）拍拖，Christy正是朱敏瀚的舊愛；有傳Christy與朱敏瀚分手，全因朱的現任女友余思霆介入。昨日馬貫東與余思霆出席明珠台活動，馬貫東指不在乎女友過去，余思霆亦表明並非第三者，絕對問心無愧。

馬貫東及余思霆昨日出席《直覺追兇》第二季記者會，馬貫東與女友Christy在家中布置窗口的相片曝光，問他是否與女友同居？他說︰「我哋只係抹窗啫，唔係布置，其他感情嘢唔答喇，想低調啲，拍拖係兩個人嘅事，唔想被太多事情影響到。」

與Christy拍拖僅數個月的馬貫東，明顯想保護愛苗，問他知否女友是朱敏瀚前度？他有備而來說︰「過咗去就真係過咗去，好多嘢都唔會介意同太介懷，執着都無意思，最重要係依家。」他透露女友是圈外人，對報道難免感困擾，他不想女友承受壓力，希望兩人感情事盡量低調和平淡。雖然兩人拍拖時間不長，但今年33歲的馬貫東已有結婚打算︰「如果可以都會想結婚，不過要有事業基礎，可能搏殺多一陣先。（做咗視帝先？）咁又太大壓力，起碼都先置業，有個安樂窩先結婚。」

余思霆拒認第三者

同場的余思霆為朱敏瀚的現任女友，她表示得知男友的舊愛Christy正與馬貫東拍拖。余思霆與馬貫東同場可會尷尬？馬貫東說：「大家係成熟嘅人，工作還工作，感情還感情，唔會特別拉埋一齊。」余思霆附和說︰「同埋都過咗去啦，依家大家幸福咪好囉。」有傳她令朱敏瀚及Christy分手？她說：「我之前都否認過，所以唔再答。（介意被稱第三者？）自己做咗啲乜自己知嘛，我問心無愧。」

撰文︰倪小珊

美術︰梁政敏

攝影︰林良明

編輯：李潔盈