5年前為求婚$130盡沽騰訊「感動到喊」 今日回首賺少2,300萬「哭成淚人」

有咖啡店喺社交媒體發文，指有男顧客近日收到一張由該咖啡店寄出嘅「未來明信片」，提到喺5年前以130元盡沽60手騰訊（00700）來買戒指求婚，而家再睇返張明信片後「哭成了淚人」。

「牧羊少年咖啡館」日前喺Facebook專頁分享來自一位男客人嘅Msg，佢話「昨日收到了5年前在你們咖啡館寄給自己的明信片。收到後，我哭成了淚人。」張未來明信片係事主喺2015年8月底親手所寫，入便提到當時佢決定買戒指向女朋友求婚，於是將2008年以每股9.5元買入嘅60手騰訊，喺130元全數沽出，仲話「放晒果一刻，有d感動到想喊」。

但係網民見到個帖子就唔係咁諗，紛紛為事主錯過咗騰訊近5年嘅升幅而「揼心口」，好似有網民就留言話相信事主好想喊，係因為好後悔咁早沽晒！甚至話事主見到呢張明信片，應該好想即刻掉咗隻戒指，換返60手騰訊。

{{hket:inline-image name="0908WLfeaturepage543.jpg"}}{{/hket:inline-image}}

▲騰訊控股有限公司2019年股東周年大會。（資料圖片）

咁究竟事主錯過咗幾多升幅呢？如果明信片內容屬實，事主喺2008年以每股9.5元買入60手騰訊，當時一手200股，即一共買入1.2萬股，成本約11.4萬元。2014年騰訊股價升破500元後1拆5，之後事主持股增至6萬股，再到2015年以每股130元全數沽出，一共套現780萬，減去本金，持股7年大賺768.6萬，其實獲利已經好豐厚。不過，如果事主當年沒有沽貨買鑽戒，持倉到而家的話，以騰訊昨日收市價511元計，該批股份價值約3,100萬元，即原本帳面可以再賺多2,300萬。

所以，究竟事主而家收到5年前嘅明信片，係因為回億起當年求婚時嘅感動吖，定係因為賺少咗成2,300萬而「哭成了淚人」呢？答案真係見仁見智。

其實騰訊2004年以招股價3.7元上市，當中經歷多次拆細，中途沽貨止賺嘅投資者肯定唔少，如果個個都呻自己太早沽貨，相信無十萬都有幾萬人。其實所有明星股重磅股都類似，大多數投資者都無耐性等公司慢慢發展，太早就以睇落好合理嘅股價沽貨，犧牲咗之後賺100%甚至是1,000%嘅機會。而且過早沽出會令投資者不斷為資金尋找新投資機會，但交易愈頻繁，犯錯機會就愈大，交易成本亦會愈多。

{{hket:inline-image name="0908WLfeaturepage542.jpg"}}{{/hket:inline-image}}

▲騰訊控股（00700）於2004年上市。（資料圖片）

因為等錢用而要套現股票，例如用來做首期買樓其實都好普遍，不過上述個案用套現得來嘅700幾萬來買戒指，似乎又唔太合理，因為好少人會用咁多錢買鑽戒，相信事主筆錢除咗買戒指之外另有用途，話唔定用來置業準備新婚用，只係寫明信片無寫得咁詳盡。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/