【打卡一流】海洋公園纜車都市傳說純屬誤會?首次開放「神秘」山徑湯怡搶先行

香港有一個都市傳說，指海洋公園曾經發生纜車失事，一整個車廂墜落山崖，車廂內載住嘅一家四口因而身亡。有傳園方當時以直升機將一大幅白色海馬旗掩蓋失事位置；甚至有恐怖傳言指，坐纜車上千祈唔好往下仔細觀察，因為可能會發現一個損毀嘅車廂，有人向你招手……有傳海洋公園都係因為咁而從來唔開放纜車下嘅行山徑。

{{hket:inline-image name="CableCarStation.jpg"}}{{/hket:inline-image}}

（海洋公園官方網站）

呢個都市傳說，至今仍有唔少人會提起，不過仔細翻查舊新聞，發現1983年《華僑日報》曾經為此事替海洋公園澄清，報道指新加坡聖淘沙附近曾發生架空纜車墮海慘劇，導致七人喪生，指「意外帶來恐怖聯想」，並強調「本港架空纜車系統從未發生過意外」，呼籲市民可以放心乘搭。

{{hket:inline-image name="b9cf44658d9d8bd6705dd0e9f39693f3.jpg"}}{{/hket:inline-image}}

（網上圖片）

1976年加入樂園纜車部的高級纜車監督許泰儒，亦曾為公園澄清。實情係80年代初南朗山出現一次龍捲風，許泰儒當日亦有上班負責纜車維修，佢指當時有纜車車頂蓋被龍捲風吹落山腳，其他人見到車頂蓋就誤以為係整架車，於是就傳出「跌過人、死過人」，以訛傳訛。海洋公園纜車經理簡英富曾於2006年接受訪問亦提到，當時山頂處發生龍捲風，將鋼纜扯離纜塔，園方須即時搶修，才能將纜車上的乘客送回上落站。而由於纜車初時屬舊式設計，外罩離車廂較高，故外罩被吹掉進深谷惹起誤會，事實上並無人傷亡，許泰儒指：「完全無咁嘅事，有咩可能發生人命嘅事，喺香港可以被掩蓋到？」

{{hket:inline-image name="green_staycation_inside_desktop_tc.jpg"}}{{/hket:inline-image}}

（海洋公園官方網站）

受第3波疫情影響，主題樂園至今關閉近2個月，海洋公園昨日宣布推出「森度遊」計劃，運用海岸綫及依山而建的環境，融入遠足、瑜伽、露營等多項新元素，冀望畀遊人體驗「不一樣的海洋公園」，到時會有專人帶大家踏上首次對外開放嘅山徑，大家可以親手打開山徑嘅神秘面紗。

{{hket:inline-image name="118946820_365814084425340_8424119334060298694_n.jpg"}}{{/hket:inline-image}}

（IG圖片）

唔少藝人都搶先試行，湯怡留言推介：「有靚海景之餘，仲有纜車喺你隔籬，輕輕鬆鬆，一家大細都適合。」旅遊達人洪永城都親身試咗呢個全長約1公里遠足徑：「今日出左一身汗，睇到港島南岸的風景都覺得抵番，同平日纜車上既感受係完全唔同。」

{{hket:inline-image name="119224211_261025471584803_2944018003327571013_n.jpg"}}{{/hket:inline-image}}

（IG圖片）

梁芷珮前日親身行過，對呢個活動讚不絕口：「對住個無敵大海景，又靜又舒服，仲有好多纜車做背景打卡影相，好開心呀！」

{{hket:inline-image name="118991661_820349201835070_6858895422264821361_n.jpg"}}{{/hket:inline-image}}

（IG圖片）

撰文：黃蘊姿