【聲明】港生活網站並無進行電話推廣活動

蔣家大小姐原來是戲癡 賴慰玲︰無戲做我會技癢

發佈時間: 2020/09/14

賴慰玲在《反黑路人甲》飾演四聯幫蔣家大小姐蔣千霞,亮眼演出獲得不少掌聲,她表示觀眾反應非常正面,而且很喜歡她跟張振朗的CP感情綫,令她特別開心,她說︰「其實成套戲入面,每個人都有好嘅發揮,大家都好投入同齊心去做件開心事,觀眾自然睇得開心。我同振朗真係一拍即合玩出默契,好似戲癡咁,一齊去諗點樣再演好啲場戲,就算呢排宣傳見到面,仲回味緊如果當時點點點就會再好啲啦。」

劇集《反黑路人甲》本周大結局,蔣千霞跟手下高彬(張振朗飾)有着千絲萬縷的感情轇轕,無奈是一黑一白、一尊一卑的前提下,他們的愛情能否開花結果呢?

34歲的賴慰玲讀演藝學院出身,曾經因為迷戀劇集《天幕下的戀人》而當上商場客戶服務員,又曾在迪士尼樂園演過海盜,她自認是「戲癡」,現實中的她就如《反黑路人甲》中的「張細倫」,她表示從來不介意做配角︰「工作滿足感來自拍攝過程,當睇playback見到自己演得啱喇,就係呢個感覺。劇集之後會剪接、出街後收視或者得獎與否,很多東西都無得控制,我可以控制的就是認真做好每場戲。我最唔開心係無戲做,我真係會技癢。」她形容愛戲的程度跟有人迷戀咖啡、追求插花一樣,有種解釋不了的聯繫,亦因着戲劇而存在着。

不為家庭放棄事業

賴慰玲表示,17年她懷孕5個月時照樣拍《棟仁的時光》,後來當上人妻和人母後,對她的人生有着正面影響,她說︰「如果沒有這些人生經歷,依家嘅我都唔係依家嘅我啦,每一個經歷造就緊依家嘅自己,結婚生仔令我改變好多,依家變得有耐性,更加能夠體會每件事情。成熟的演員都需要進步,就是靠人生跟住我的演員歷程一齊去進步。」

囝囝Marat今年三歲,樣子非常可愛,不過賴慰玲從沒打算為家庭放棄事業,她說︰「我唔係事業排第一,只係人生應該要作出平衡,不同階段的重心在不同位置,但不會只得一樣嘢,不同範疇都會享受,你才不會被淘汰。」她笑言囝囝年紀還小,不太明白媽媽是演員,可能會覺得世界上每個媽媽都會出現在電視機前,賴慰玲說︰「我哋好close呀,我無請外傭,平時由老公煮飯,因為我唔識煮,不過我哋三個人一條命呀!」

住郊區親近大自然

有別於怪獸家長的進取思維,賴慰玲未有為兒子追求名校網,一家人選住郊區村屋,她表示非常享受,特別是疫情期間,在家附近已經可以接觸大自然。她說︰「我們和附近農田主人好熟絡,佢有自己的農場同小魚塘,不同季節出產不同蔬果,我都學到好多嘢。原來有些蔬果係某些季節先有,魚要某個酸鹼度才可以生存,溪水山上流下來原來可以貫穿好多塊田,行過見到毛毛蟲就係將來的蝴蝶……依家我哋經過就知道那是甚麼樹,呢啲正正係我哋細個接觸唔到。細個喺街市買的東西都唔知道係點嚟,又點會懂得珍惜?依家我知道原來要種植三個月,要幫手翻土、落種子、施肥同用有機方法去杜蟲,先會得到呢樣嘢,仲會一齊去收割,整個感覺好唔同。」

化粧 ︰ Meegan Seak

髮型︰Green Cheung @ AdmiX Hair Styling

場地︰ 慢理牆城 Wall Is Eat

撰文︰楊安莉

編輯︰黃寶恩

美術︰梁政敏

攝影︰楊嘉傑

蔣家大小姐原來是戲癡 賴慰玲︰無戲做我會技癢

《反黑路人甲》中,與王浩信、林宣妤和傅嘉莉的蔣家四兄妹,兄妹情十分真摯。(IG圖片)

蔣家大小姐原來是戲癡 賴慰玲︰無戲做我會技癢

賴慰玲飾演的四聯幫蔣家大小姐蔣千霞,霸氣十足,獲不少網友讚好。

蔣家大小姐原來是戲癡 賴慰玲︰無戲做我會技癢

圈中五位知己好友包括蔡思貝、陳嘉寶、吳嘉熙、陳瀅及何雁詩。(IG圖片)