「卸貨」在即 譚凱琪安胎日子超充實

譚凱琪（Zoie）今年二月與拍拖八年的圈外男友莊日宇（Enrico）結婚，六月底更宣布懷孕，兩口之家快將加入新成員。目前懷孕到中後期的Zoie，近日已經暫停工作專心安胎，她日前接受《晴報》訪問時，透露每日忙於烹調三餐，又會上網搜購各樣新生嬰兒用品，日子過得十分充實，她表示︰「醫生叫我喺屋企每個鐘要感受下有冇胎動，所以喺屋企都幾忙。」

38歲的Zoie與老公婚後火速造人，短短幾個月便宣布成功懷孕，認真可喜可賀。她對腹中胎兒的性別一直守口如瓶，留待日後才親自揭盅，不過臨盆在即，她與老公都十分期待BB出世，Zoie表示︰「依家已經無初初咁緊張，放鬆咗啲，但會特別小心，戒咗凍飲、生冷嘢食。」她又透露已選擇剖腹生B。由於是第一胎的關係，她與老公已請定陪月，以便好好照顧BB，避免出錯。

幸好Zoie有很多朋友已經成為父母，她不時向他們取經，Zoie說︰「朋友個個都好有經驗，在這個孕期期間，有好多東西要安排，好似BB出世要用的物品、BB床，好多嘢都要研究，餵母乳又要揀合適的吸奶器，我都會問佢哋，陳凱琳就係其中一個。」由於懷孕期間撞正疫情，Zoie大部分時間都足不出戶，就連產檢都安排延期，她說︰「因為想謹慎啲，盡量唔想外出有風險，醫生叫我喺屋企每個鐘頭感受下有冇胎動，我又會上網睇下哪些食物對BB好，同時自己會煮三餐，時間好充實。」

讚森美喜感強

Zoie有份演出的《過街英雄》剛播畢，雖然她未有參與宣傳活動，但在家安胎期間都會晚晚追看劇集，她大讚對手森美為人幽默風趣，是一位好好的前輩。Zoie表示︰「森美大哥真係天文地理咩都識，喺佢身上學到好多嘢，唔使拍劇同佢傾偈時，覺得佢學識好廣博，同埋佢拍喜劇好funny，好有趣味性。其實喜劇真係唔易做，我同屋企人睇套劇都覺得好輕鬆，好好笑，近年我都鍾意睇啲唔使點用腦嘅戲，趣味啲，好似漫畫咁，幾得意。森美大哥演喜劇的節奏好好，我好少拍喜劇，都要向佢學習。」

化粧︰Aiko Tsang

服裝︰Tory Burch

飾物︰The Styling Concepts

Styling︰Jacky & Jenny & The Styling Concepts

撰文︰倪小珊

攝影︰ctkkit

編輯︰黃寶恩

美術︰梁政敏